सामग्री खोज्नुहोस्

काठमाडौँ । रसुवाको भोटेकोशीमा यही भदौ १० गते आएको बाढीका कारण १२ वटा बैङ्कका १७ वटा शाखा प्रभावित भएका छन् ।

राष्ट्रिय योजना आयोग र राष्ट्रिय विपद् जोखिम न्यूनीकरण तथा व्यवस्थापन प्राधिकरणले तयार पारेको द्रुत क्षति तथा आवश्यकता मूल्याङ्कन (आरडिएनए) प्रतिवेदनअनुसार बैङ्क तथा वित्तीय क्षेत्रमा रु ७२ करोड ४० लाख बराबरको क्षति भएको छ ।

प्रतिवेदनअनुसार सबैभन्दा बढी क्षति कृषि विकास बैङ्कमा भएको छ । बैङ्कको एउटा शाखामा रु ६५ करोड बराबरको क्षति भएको छ । त्यस्तै, सिटिजन्स बैङ्कको एउटा शाखा प्रभावित हुँदा रु एक करोड ५६ लाखको क्षति भएको छ ।

ग्लोबल आइएमई बैङ्कको एउटा शाखामा रु ११ लाख, हिमालयन बैङ्कको एउटा शाखामा रु ७५ लाख र लक्ष्मी सनराइज बैङ्कको एउटा शाखामा रु एक करोड १२ लाख बराबरको क्षति भएको प्रतिवेदनमा उल्लेख छ ।

माछापुच्छ्रे बैङ्कको एउटा शाखामा रु ७५ लाख तथा नबिल बैङ्कको एउटा शाखामा रु ६३ लाखको क्षति भएको छ । एनआईसी एसिया बैङ्कका तीन वटा शाखा प्रभावित हुँदा रु ८८ लाख र नेपाल इन्भेष्टमेन्ट मेगा बैङ्कका तीन वटा शाखामा रु ४० लाख बराबरको क्षति भएको छ ।

त्यसै गरी, एनएमबी बैङ्कको एउटा शाखामा रु चार लाख, प्रभु बैङ्कका दुई वटा शाखामा रु ५३ लाख तथा सानिमा बैङ्कको एउटा शाखामा रु ६३ लाख बराबरको क्षति भएको प्रतिवेदनमा उल्लेख छ ।

प्रतिवेदनअनुसार बाढी प्रभावित क्षेत्रमा बैङ्क तथा वित्तीय सेवासँग सम्बन्धित भौतिक संरचनामा समेत क्षति पुगेको छ । नुवाकोटको विदुर नगरपालिकामा बैङ्कका चार वटा शाखामा रु ६७ करोड १३ लाख बराबरको क्षति भएको छ । रसुवाको गोसाइँकुण्ड गाउँपालिकामा ११ वटा शाखामा रु चार करोड २३ लाख, कालिका गाउँपालिकामा एउटा शाखामा रु २८ लाख र उत्तरगया गाउँपालिकामा एउटा शाखामा रु ७५ लाख बराबरको क्षति भएको जनाइएको छ ।

यसै गरी, उक्त रकमबाहेक बैङ्क तथा वित्तीय क्षेत्रसँग सम्बन्धित अन्य संरचनामा रु १९ करोड ५९ लाख बराबरको थप क्षति भएको प्रतिवेदनमा उल्लेख छ । जसअनुसार नुवाकोटको विदुरमा रु छ करोड ४० लाख, रसुवाको गोसाइँकुण्डमा रु नौ करोड ५३ लाख, कालिका गाउँपालिकामा रु ७९ लाख र उत्तरगया गाउँपालिकामा रु तीन करोड २३ लाख बराबरको क्षति भएको छ ।