© 2026
१ आश्विन २०८३, बिहीबार
१ आश्विन २०८३, बिहीबार
काठमाडौँ । कानुन, न्याय तथा संसदीय मामिलामन्त्री सोविता गौतमसँग नेपालका लागि बेलायतका राजदूत रब फेनले शिष्टाचार भेट गरेका छन् ।
आज मन्त्रालयमा भएको भेटमा उनीहरूबीच जलवायु परिवर्तनका कारण भइरहेको अपूरणीय क्षति र त्यसको ठूलो जोखिम नेपालले बेहोर्नुपरेको विषयमा छलफल भएको थियो ।
मन्त्री गौतमले अप्रत्याशित बाढीपछि विकासलाई विपद् प्रतिरोधी बनाउने विषयलाई नेपालले प्राथमिकतामा राख्ने बताइन् । उनले दिगो र उत्थानशील विकासका लागि मित्रराष्ट्र र दातृ निकायको सहयोग निरन्तर रहने विश्वास व्यक्त गरिन् ।
सो अवसरमा राजदूत फेनले भोटेकोशी बाढीबाट निम्तिएको अप्रत्याशित विपद्बाट भएको मानवीय क्षतिप्रति समवेदना प्रकट गर्दै सम्पर्कविहीन व्यक्तिहरूको खोजी कार्यलाई प्रभावकारी बनाउनुपर्नेमा जोड दिए । राजदूत फेनले आर्थिक, प्राविधिक र मानव स्रोतमार्फत विकासका कार्य तथा पुनःस्थापनाका लागि बेलायत सरकारले आपसी सहयोग र समन्वयलाई निरन्तरता दिने प्रतिबद्धता व्यक्त गरे ।
© 2026
All rights reserved.
Design & Developed By:
