सामग्री खोज्नुहोस्

डार्विन । बङ्गलादेशले आइतबार डार्विनमा भएको पहिलो टेस्टमा अस्ट्रेलियालाई ९ विकेटले पराजित गर्दै अस्ट्रेलियाली भूमिमा आफ्नो पहिलो टेस्ट जित दर्ता गरेको छ ।

अस्ट्रेलियालाई दोस्रो इनिङ्समा २८४ रनमा अलआउट गरेपछि बङ्गलादेशले जितका लागि पाएको ५७ रनको लक्ष्य एक विकेट गुमाएर पूरा गर्‍यो । मोमिनुल हकले ब्याकवार्ड पोइन्टतर्फ चौका प्रहार गर्दै टोलीलाई ऐतिहासिक जित दिलाए ।

बङ्गलादेशले पहिलो इनिङ्समा अस्ट्रेलियालाई १९८ रनमा अलआउट गरेपछि ४२६ रन बनाएको थियो । त्यसपछि दोस्रो इनिङ्समा पनि उत्कृष्ट बलिङ गर्दै घरेलु टोलीलाई दबाबमा राखेको थियो ।

बङ्गलादेशका मेहदी हसन मिराजले दोस्रो इनिङ्समा ६६ रन खर्चेर पाँच विकेट लिए । तीव्र गतिका बलर हसन महमुदलगायतले पनि अस्ट्रेलियाली ब्याटिङलाई लगातार दबाबमा राखे ।

अस्ट्रेलियाका लागि क्यामरन ग्रीनले १०४ रनको शतकीय पारी खेले पनि अन्य ब्याट्सम्यानबाट पर्याप्त साथ पाउन सकेनन् । ग्रीनको यो तेस्रो टेस्ट शतक हो ।

बङ्गलादेशका कप्तान नजमुल हुसेन शान्तोले जितलाई टोलीका लागि अहिलेसम्मकै ठूलो उपलब्धिमध्ये एक भएको बताए । “कुनै पनि ढाँचामा बङ्गलादेशका लागि यो अहिलेसम्मकै ठूलो जित हो”, उनले भने, “हामी भविष्यमा अझ विशेष उपलब्धि हासिल गर्न चाहन्छौँ ।”

उनले बङ्गलादेशका तीव्र गतिका बलरहरूले पछिल्ला वर्षमा टेस्ट क्रिकेटलाई दिएको प्राथमिकताले टोलीको प्रदर्शनमा सुधार आएको बताए । अस्ट्रेलियाका कप्तान प्याट कमिन्सले बङ्गलादेशको प्रदर्शनको प्रशंसा गर्दै टोलीले खेलका सबै पक्षमा आफ्नो टोलीलाई पछि पारेको स्वीकार गरे ।

“उनीहरूले हामीलाई हरेक पक्षमा पछि पारे । उनीहरू धैर्यवान र अनुशासित थिए”, कमिन्सले भने । बङ्गलादेशले अस्ट्रेलियामा टेस्ट जितका लागि गरेको यो तेस्रो प्रयास थियो । यसअघि अस्ट्रेलियाली भूमिमा खेलेका दुई टेस्टमा उसले जित हासिल गर्न सकेको थिएन ।

बङ्गलादेशले अभ्यास खेलमा ‘क्रिकेट अस्ट्रेलिया–११’ विरुद्ध दोस्रो इनिङ्समा ५४ रनमा अलआउट भएर ठूलो हार बेहोरेको थियो । तर टेस्टमा भने टोलीले ब्याटिङ, बलिङ र फिल्डिङ तीनै पक्षमा उत्कृष्ट प्रदर्शन गर्दै बलियो मानिएको अस्ट्रेलियालाई स्तब्ध बनायो ।

बङ्गलादेशका लागि ओपनर तान्जिद हसनले पहिलो टेस्ट शतकसहित ४२६ रनको विशाल योगफल बनाउन महत्वपूर्ण योगदान दिएका थिए । उनले बनाएको दबाबपछि बङ्गलादेशी बलरहरूले अस्ट्रेलियाली ब्याटिङलाई निरन्तर नियन्त्रणमा राखे ।

दोस्रो इनिङ्समा ग्रीन र मिचेल स्टार्कले केही समय अस्ट्रेलियाको प्रतिरोध कायम राखे पनि बङ्गलादेशी बलरहरूले लगातार विकेट लिए । मेहदीले एलेक्स केरी र क्यामरन वेबस्टरलाई आउट गर्दै अस्ट्रेलियालाई सङ्कटमा धकेले भने हसन महमुदले ग्रीनलाई आउट गरे ।

मेहदीले नाथन लियोनलाई एलबिडब्लु आउट गरेपछि अस्ट्रेलियाको इनिङ्स २८४ रनमा समेटियो र बङ्गलादेशले ५७ रनको सामान्य लक्ष्य पायो । पहिलो ओभरमै तान्जिद हसन गुमाए पनि मोमिनुल हक र शादमान इस्लामले सहज रूपमा लक्ष्य पूरा गरे ।