सामग्री खोज्नुहोस्

बुटवल । पछिल्लो समय देशभर सुकुम्बासी, अव्यवस्थित बसोबासी र भूमिहीनको विषयलाई लिएर आन्दोलन चर्किँदै गएको छ। यसैबीच सुरक्षित आवासको अवधारणा सहित सरकारले नयाँ कार्ययोजना अघि सारेको जनाएको छ। देशका विभिन्न स्थानहरूमा भूमिअधिकार सम्बन्धी आन्दोलन तीव्र बन्दै गएको सन्दर्भमा बुटवलमा पनि आज जनप्रदर्शन भएको छ।

यही विषयमा प्रतिक्रिया जनाउँदै रास्वपा रुपन्देहीबाट निर्वाचित सांसद मञ्जु भुसालले आन्दोलनमा सहभागी नागरिकहरूलाई धैर्य र संयम अपनाउन आग्रह गरेकी छन्। उनले भूमिहीन तथा सुकुम्बासीको समस्या आफ्नै समस्या भएको उल्लेख गर्दै आफू सधैं जनताको पक्षमा उभिने प्रतिबद्धता समेत व्यक्त गरेकी छन्। सांसद भुसालले उक्त धारणा बिहीबार सामाजिक सञ्जाल फेसबुकमार्फत सार्वजनिक गरेकी हुन्।

फेसबुकबाट साभार

बुटवल क्षेत्रमा पछिल्ला समय भइरहेको औद्योगिक क्षेत्रभित्र रहनुहुने नागरिक, सुकुम्बासी, अव्यवस्थित बसोबासी तथा भूमिहीन नागरिकहरूको आन्दोलनप्रति म र मेरो पार्टीको गम्भीर ध्यानाकर्षण भएको छ। रुपन्देहीका हजारौँ नागरिकहरू वर्षौंदेखि पुर्जाको आशामा बसोबास गर्दै आइरहनुभएको यथार्थ हामी सबैसामु स्पष्ट छ। लामो समयदेखि जमिन भोगचलन गर्दै संरक्षण गरी आउनुभएका नागरिकहरूको उचित व्यवस्थापन गर्नु राज्यको दायित्व हो भन्ने विषयमा हामी प्रतिबद्ध छौँ।

राष्ट्रिय स्वतन्त्र पार्टी नेतृत्वको वर्तमान सरकारले भूमिहीन, सुकुम्बासी तथा अव्यवस्थित बसोबासी नागरिकहरूको समस्या समाधानलाई उच्च प्राथमिकताका साथ अघि बढाइरहेको छ। त्यसैले सम्पूर्ण आन्दोलनरत नागरिकहरूलाई संयमित, शान्तिपूर्ण तथा जिम्मेवार हुनुहुन हार्दिक अनुरोध गर्दछु।

मोतिपुर औद्योगिक क्षेत्र रानीगंज सम्बन्धी विषय औद्योगिक विकाससँग मात्र नभई त्यहाँ बसोबास गर्दै आएका नागरिकहरूको जीवन, भविष्य र अधिकारसँग जोडिएको संवेदनशील विषय हो। औद्योगिक क्षेत्र घोषणा हुनुअघि नै त्यहाँ बस्ती विस्तार भइसकेको वास्तविकतालाई मध्यनजर गर्दै विकास र नागरिक अधिकारबीच सन्तुलन कायम गरी समाधान खोजिनुपर्छ भन्ने हाम्रो स्पष्ट धारणा रहेको छ।

यस विषयहरुमा सम्बन्धित मन्त्रालय तथा निकायहरूसँग निरन्तर समन्वय भइरहेको छ। कानुनी रूपमा भूमिहीन सुकुम्बासी र अव्यवस्थित बसोबासी हरुको उचित व्यवस्थापन हुन्छ। सोही अनुरुप कोई व्यक्ति पनि नेपालमा भूमिहीन बन्नु पर्दैन। जनताको सुरक्षित बसोबासको अधिकार सुनिश्चित गर्दै विकासलाई अगाडि बढाउनु आजको आवश्यकता हो। यहाँहरूको समस्या मेरो आफ्नै समस्या हो भन्ने आत्मबोधका साथ म निरन्तर रूपमा नागरिकहरूको पक्षमा उभिएकि छु ।

मञ्जु भुसाल
प्रतिनिधि सभा सदस्य
रुपन्देही क्षेत्र नम्बर २