खोज

काठमाडौं, २३ मंसिर ।

नेपाली कम्युनिस्ट पार्टी (नेकपा) का संयोजक पुष्पकमल दाहाल ‘प्रचण्ड’ ले हालसम्म सार्वजनिक चर्चामा आएका सबै काण्ड तथा २०४६ सालयता उच्च पदमा पुगेका व्यक्तिहरूको सम्पत्ति छानबिन हुनुपर्ने माग पुनः दोहोर्‍याएका छन् ।

भ्रष्टाचार विरुद्धको २२औँ अन्तर्राष्ट्रिय दिवसका अवसरमा मंगलबार शुभकामना सन्देश जारी गर्दै उनले यस्ता प्रकरणमा कडाइपूर्वक कारबाही आवश्यक भएको उल्लेख गरेका हुन् ।

उनको सन्देशमा भनिएको छ, ‘प्रशासनिक सुधार, सार्वजनिक खरिदमा पारदर्शिता, दण्डहीनताको अन्त्य, सम्पत्ति शुद्धीकरणमा कडाइ र नागरिकको सक्रिय निगरानीजस्ता महत्त्वपूर्ण कदम चालिएका छन् ।

हालसम्मका सबै चर्चित काण्ड तथा २०४६ यता उच्च पदस्थ व्यक्तिहरूको सम्पत्ति छानबिनको माग मैले संसदको रोष्ट म बाटै उठाएको थिएँ र आजको दिवसमा फेरि त्यही माग सशक्त रूपमा दोहोर्याउँछु ।’

प्रचण्डले आफ्नो प्रधानमन्त्री कार्यकाल स्मरण गर्दै भनेका छन्, ‘हाम्रा लागि सुशासन राज्य सञ्चालनको मूल मन्त्र थियो । सुशासनका पक्षमा दृढतापूर्वक उभिँदा दलाल, बिचौलिया र भ्रष्ट तत्त्वहरूको स्वार्थमा चोट पुग्यो, जसका कारण हाम्रो नेतृत्वमा बनेको सरकारले साजिसपूर्ण रूपमा गिरावटको सामना गर्नुपर्‍यो ।

तर पनि त्यस अवधिमा सुशासनका धेरै महत्त्वपूर्ण मानकहरू स्थापित भए । कुनै राजनीतिक आग्रह–पूर्वाग्रह बिना, भुटानी शरणार्थीसहित ठूला भ्रष्टाचार काण्डहरूको अनुसन्धान अघि बढाइयो ।’

भ्रष्टाचार विरोधी अभियान एक दिनमा सम्पन्न हुने कार्य नभएको उल्लेख गर्दै उनले यसलाई निरन्तर चलिरहने सङ्घर्षका रूपमा व्याख्या गरे ।

उनका अनुसार, यो दिवसले सुशासन, पारदर्शिता र जवाफदेहिताप्रतिको जिम्मेवारीलाई थप सुदृढ बनाउँदै भ्रष्टाचारमुक्त, समृद्ध र समाजवादी नेपाल निर्माण गर्ने सङ्कल्पलाई बल दिने विश्वास लिएको छ ।