खोज

पाल्पा ।

पाल्पा जिल्लाको सबैभन्दा पुरानो र लामो समयदेखि अधुरो रहँदै आएको तानसेन–बाँधखोरस्थित शीत भण्डारको निर्माण कार्य पूरा गर्न नगर सरकारले अन्तिम पटक म्याद थप गरेको छ। भारतीय सरकारको सहयोगमा निर्माण भइरहेको यो परियोजना वर्षौदेखि रोकिँदै आएको थियो।

२०६९ फागुन २३ गते चार करोड ९९ लाख १९ हजार रुपैयाँ लागतमा दुई वर्षमा सम्पन्न गर्ने लक्ष्यसहित शीत भण्डार निर्माणको जिम्मा जय रक्तकाली गोरखा कन्स्ट्रक्सनले पाएको थियो। तर, एक तला छत ढलान गरेपछि निर्माण कम्पनीले काम रोकिदिएपछि परियोजना लामो समय अधुरो रह्यो।

राजमार्गबाट दुई किलोमिटर भित्र पहुँचमार्ग निर्माणपछि केही समय काम अगाडि बढे पनि भारतीय पक्षबाट रकम रोकिएपछि निर्माण कम्पनीले पुनः काम स्थगित भएको जनाएको थियो। लामो अलमलपछि नगर सरकारले ठेक्का तोडेर साझेदारी कम्पनीमार्फत काम अघि बढाएको हो।

नगर प्रमुख इन्जिनियर रामप्रसाद श्रेष्ठका अनुसार हाल पूर्वाधार निर्माण सकिएको छ र केवल भित्रका विद्युतिय उपकरण जडान गर्ने काम मात्र बाँकी छ। यही संवेदनशील उपकरण जडानका कारण पुष मसान्तसम्म अन्तिम पटक म्याद थपिएको उनले बताए।

निर्माण कम्पनीका प्रतिनिधि रामचन्द्र भटले प्रारम्भिक अवस्थामा नै बिल भुक्तानी प्रक्रिया कडाइका कारण काम प्रभावित भएको दाबी गरे।

पाल्पा जिल्लामा पछिल्लो केही वर्षयता सुन्तला उत्पादनले व्यावसायिक रूप लिइरहेको छ। तर, शीत भण्डार निर्माण अधुरै रहेकाले किसान हरेक वर्ष जथाभावी बिक्री गर्न बाध्य छन्।
किसान खिमानन्द पोखरेल भन्छन्, “शीत भण्डार तयार भएको भए अहिले हाम्रो सुन्तला त्यहीँ भण्डारण हुन्थ्यो। हरेक वर्ष जस्तै यो वर्ष पनि हामीलाई निराश हुनुपर्‍यो।”

शीत भण्डार निर्माण कहिले पूरा हुने भन्ने प्रश्नमा किसानदेखि उपभोक्ता सबैको चासो बढिरहेको छ। नगर सरकारका अनुसार यो म्याद अन्तिम भएकाले यसपटक काम पूरा गरेर सञ्चालनमा ल्याइनेछ।