खोज

बुटवल ।

आरम्भ चौतारी लघुवित्त वित्तीय संस्था लिमिटेड, बुटवल शाखाले सदस्यहरूलाई लक्षित गरी एक दिने वित्तीय साक्षरता कार्यक्रम सम्पन्न गरेको छ । बुटवल शाखाका स्टेशन म्यानेजर सन्तोष कुमार चन्दको अध्यक्षतामा भएको कार्यक्रमको उद्घाटन उप–प्रमुख सावित्रा देवी अर्यालले गरेकी थिइन् ।

त्यस अवसरमा अर्यालले संस्थाबाट प्राप्त कर्जा लक्षित उद्देश्यअनुसार प्रयोग गरी उत्पादनशील क्षेत्रमा लाग्नुपर्नेमा जोड दिँदै महिलालाई आत्मनिर्भर र उद्यमशील बनाउन संस्था महत्वपूर्ण भूमिकामा रहेको बताइन् । उनले आरम्भ चौतारीले समुदायमै गएर डस्टबिन वितरण, रक्तदान, बीमा रकम हस्तान्तरण, व्यावसायिक पशुपालन तथा सीपमूलक तालिमलगायतका सामाजिक गतिविधिमार्फत समाजमा सकारात्मक प्रभाव पारेको उल्लेख गरिन् ।

 नेपाल राष्ट्र बैंकबाट “घ” वर्गको इजाजतपत्र प्राप्त आरम्भ चौतारी लघुवित्तले सातै प्रदेशका ५७ जिल्लामा १४० शाखामार्फत सेवा प्रवाह गर्दै आएको छ । संस्थाको हाल देशभर १ लाख ३ हजारभन्दा बढी सदस्य रहेको शाखा स्टेशन म्यानेजर  चन्दले जानकारी दिए । विपन्न, पिछडिएको, एकल महिला, अपांगता भएकाहरू, दलित तथा द्वन्द्वपीडितलाई संस्थाले कर्जामा १ प्रतिशत ब्याज छुटका साथै पहुँचयुक्त वित्तीय सेवा उपलब्ध गराउँदै आएको छ ।

कार्यक्रममा वडा अध्यक्ष लोकनाथ न्यौपाने, वडा ३ का अध्यक्ष विष्णु ढकाल, भद्रकाली बहुउद्देश्यीय सहकारीका सदस्य देवीकुमार श्रेष्ठलगायतले आरम्भ चौतारीले महिला सशक्तीकरण, उद्यम विकास तथा सामाजिक क्षेत्रमा पुर्याइरहेको योगदानको प्रशंसा गरेका थिए ।

संस्थाले साधारण, व्यावसायिक, मौसमी, ऊर्जा, कृषि, उपभोग तथा आकस्मिक कर्जा १४.७२ प्रतिशत वार्षिक ब्याजदरमा उपलब्ध गराउँदै आएको र कर्जाको सदुपयोग, नियमित बचत र भुक्तानी प्रणालीमार्फत महिलाको आत्मसम्मान र आर्थिक क्षमतामा वृद्धि भएको कार्यक्रमका सहभागीहरूले बताए ।

आरम्भ चौतारीले आर्थिक सेवा मात्र नभई स्वास्थ्य, शिक्षा, सीप विकास, उद्यम प्रोत्साहनजस्ता गैर–वित्तीय कार्यक्रममार्फत समाज परिवर्तनमा योगदान दिँदै आएको छ । दुर्गम गाउँ–बस्तीसम्म पुगेर पिछडिएको वर्गलाई स्वरोजगार र आय–आर्जनका अवसर उपलब्ध गराउनु संस्थाको प्रमुख उद्देश्य रहेको संस्थाले जनाएको छ ।

कार्यक्रममा बुटवल शाखाका कर्मचारी भुना पौडेल, शाखा प्रबन्धक पवि पाण्डेयलगायतले पनि आ–आफ्नो धारणा राखेका थिए । कार्यक्रममा करिब १२२ केन्द्र समूहको सहभागिता रहेको थियो ।