खोज

जितपुर, कार्तिक २१ ।

आगामी मंसिर १८ गतेदेखि सुरु हुने १६औँ कपिलवस्तु महोत्सव तथा कृषि, पर्यटन र औद्योगिक प्रदर्शनी–२०८२ को तयारी तीव्र गतिमा भइरहेको आयोजक समितिले जनाएको छ। वाणगंगा नगरपालिका–४, बुद्धरंगशाला, जितपुरमा आयोजना हुने उक्त महोत्सवबारे जानकारी दिन शुक्रबार एक पत्रकार सम्मेलन गरिएको थियो।

पत्रकार सम्मेलनमा वाणगंगा वेलफेयर सोसाइटीका महासचिव बुद्धि बहादुर रोकाहा क्षेत्रीले महोत्सवको उद्देश्य, विषयवस्तु र तयारीका पक्षबारे विस्तृत जानकारी दिए। उनका अनुसार, महोत्सवले कपिलवस्तु जिल्लाको कृषि, पर्यटन तथा औद्योगिक सम्भावनालाई उजागर गर्दै स्थानीय उत्पादन, संस्कृति र पहिचानको प्रवर्द्धन गर्ने लक्ष्य लिएको छ।

कार्यक्रममा नेपाल पत्रकार महासंघका केन्द्रीय सदस्य विकास बन्जाडे, उद्योग वाणिज्य संघ कपिलवस्तुका पूर्व अध्यक्ष बिष्णु प्रसाद न्यौपाने, वर्तमान अध्यक्ष गणेश बहादुर क्षेत्री लगायतका वक्ताहरूले मन्तव्य व्यक्त गरेका थिए। उनीहरूले महोत्सव सफल बनाउन स्थानीय निकाय, व्यापारी, सञ्चारकर्मी र आम नागरिकको सहकार्य अपरिहार्य रहेको बताउँदै सबैलाई आफ्नो ठाउँबाट सहयोग गर्न आग्रह गरे।

पत्रकारहरूले महोत्सवको व्यवस्थापन, आर्थिक पारदर्शिता, स्टल व्यवस्थापन र सुरक्षा व्यवस्थासम्बन्धी जिज्ञासा राख्दा कार्यक्रमका अध्यक्ष राजकुमार खाणले ती सबै विषयमा विस्तृत रूपमा जानकारी दिएका थिए। आयोजक समितिका अनुसार, १६औँ कपिलवस्तु महोत्सव मंसिर १८ गतेदेखि पुस १ गतेसम्म बुद्धरंगशाला, वाणगंगा–४, जितपुरमा सञ्चालन हुनेछ।