खोज

नेकपा (एकीकृत समाजवादी) का सम्मानित नेता झलनाथ खनालले माओवादी केन्द्रसँग पार्टी एकता नगर्न आग्रह गरेका छन् ।

माओवादी, एकीकृत समाजवादी र महिन्द्र यादव समूहबीच पार्टी एकताको प्रक्रिया चलिरहेका बेला खनालको यस्तो धारणा आएको हो ।

जेनजी प्रदर्शनका क्रममा घाइते भएकी खनालकी पत्नी रविलक्ष्मी चित्रकारको उपचारका लागि भारतको नयाँ दिल्लीस्थित एपोलो अस्पतालमा रहेका खनालले अहिले एकीकरणको उपयुक्त समय नभएको स्पष्ट पारेका छन् ।

‘यो कसैसँग पनि पार्टी एकीकरण गर्ने समय होइन र छैन । हामी कोही पनि गलत बाटोमा हिँड्दै भड्खालोमा पर्ने र अरुलाई पार्ने दिशामा नलागौँ,’ उनले भने ।

खनालले सबै राजनीतिक दलमा पुनर्गठन र रुपान्तरण आवश्यक रहेकोमा जोड दिएका छन् ।

उनले सामाजिक सञ्जालमार्फत हालका साना-ठूला सबै दलहरू र आफ्नै पार्टीभित्रसमेत नयाँ वैचारिक, सङ्गठनात्मक र नीतिगत दिशामा पुनर्गठन आवश्यक रहेको बताएका छन् ।

‘अब देश, जनता र वामपन्थी आन्दोलनलाई नयाँ धरातलबाट उठाउन प्रत्येक पार्टीमा पुनर्गठन र रूपान्तरण अनिवार्य छ । हरेक साना-ठूला पार्टीमा र जेनजी समूहहरूमा समेत उथलपुथल र विभाजन भइरहेको छ । यसले गर्दा सबैको माग पुनर्गठन र रुपान्तरणको हो,’ उनले लेखेका छन्, ‘यो युगको माग हो, समयको माग हो र सिङ्गो राष्ट्रको मागसमेत हो ।’

आफ्नो दलले पछिल्लो चार वर्षे अवधिको समीक्षा गर्नुपर्ने पनि खनालले बताएका छन् । नवौं राष्ट्रिय महाअधिवेशनदेखि उठाइएको युवा आवाज र कार्यविधिको विषयलाई ध्यान दिनुपर्नेमा जोड दिँदै उनले पार्टीभित्रका युवाको आवाजअनुसार हुने गरी पार्टीलाई पुनर्गठन गर्नुपर्ने धारणा राखेका छन् ।

सबै कम्युनिष्ट तथा वामपन्थी शक्तिहरूलाई गोलबन्द गरी बृहत राष्ट्रिय मोर्चाको निर्माणमार्फत् प्रतिनिधिसभाको निर्वाचनमा खटिनुपर्ने उनको भनाइ छ ।