खोज

 काठमाडौं, २६ असोज ।

पूर्वराजा ज्ञानेन्द्र शाहले नियमित स्वास्थ्य परीक्षण गराएका छन् । आइतबार उनी परिवारसहित धुम्बाराहीस्थित ह्याम्स अस्पताल पुगेका हुन् ।अस्पताल स्रोतका अनुसार पूर्वराजा शाहको प्रोस्टेट बायोप्सी परीक्षण गरिएको हो । परीक्षणको रिपोर्ट पाँच दिनपछि आउने जनाइएको छ ।

“उहाँ प्रोस्टेट बायोप्सी परीक्षणका लागि आउनुभएको हो । यो नियमित स्वास्थ्य परीक्षण नै हो,” अस्पतालका एक चिकित्सकले जानकारी दिए । प्रोस्टेट पुरुषहरूमा मात्र हुने एक प्रकारको ग्रन्थी हो, जसलाई प्रायः पुरुष ग्रन्थी पनि भनिन्छ । यो ग्रन्थी पिसाब थैली (ब्लाडर) को तलतिर र मुत्रनली (युरेथ्रा) वरिपरि अवस्थित हुन्छ ।

प्रोस्टेट ग्रन्थी रेसा तथा मांसपेशीयुक्त तन्तुहरूबाट बनेको हुन्छ । उमेरसँगै अन्य ग्रन्थीहरूजस्तै यो पनि विस्तार हुन थाल्छ । तर अस्वाभाविक रूपमा बढेमा पिसाबमा समस्या उत्पन्न हुन सक्छ भन्ने चिकित्सकहरूको भनाइ छ ।

मानव शरीरमा टेस्टोस्टेरोन र एस्ट्रोजेन नामका दुई प्रमुख हर्मोन हुन्छन् । उमेर बढ्दै जाँदा टेस्टोस्टेरोनको मात्रा घट्दै जान्छ भने एस्ट्रोजेनको मात्रा बढ्छ । यस अवस्थाले प्रोस्टेट ग्रन्थीका कोषहरू विस्तार गर्न उत्प्रेरित गर्छ, जसका कारण प्रोस्टेट विस्तारै बढ्दै जान सक्छ ।