खोज

पाल्पा, १४ साउन ।

अर्घाखाँची जिल्लाबाट उदाएर बुटवलमा गीत संगीत क्षेत्रमा संघर्ष गर्दै आएकी, राष्ट्रिय स्तरमा आफ्नो पहिचान बनाइसकेकी गायिका दुर्गा क्षेत्री नेपालको नयॉ तीज गीत “रे रे रे रे” ले युवा पुस्ताको माझमा लोकप्रिय बन्दै गएको छ ।

आउँदै गरेको तीज पर्वलाई लक्षित गर्दै सार्वजनिक गरिएको यस म्युजिक भिडियोले छोटो समयमै हजारौं युवादर्शकको ध्यान खिच्न सफल भएको हो । बिशाल शोनीको शब्द र लय, दुर्गा क्षेत्री नेपालको स्वर, निरेन श्रेष्ठको कला निर्देशन र बिशाल शोनी तथा अंकिता नेपालको आकर्षक अभिनय यस गीतका रहेको छ ।

तीजको सांस्कृतिक र भावनात्मक पक्षलाई समेट्दै बनाइएको “रे रे रे रे” ले महिलाको उत्साह, युवापुस्तामा उमंग र मायापिरतीको संगम प्रस्तुत गरिएको छ । गीतमा समेटिएको नारी जीवनको चमक, पर्वको चटारो र मायालु भावनाले दर्शकलाई भावनात्मक रुपमा छुने गरेको प्रतिक्रिया आइरहेका छन् ।

गायिका दुर्गा क्षेत्री नेपाल यसअघि पनि चर्चित तीज र पन्चेबाजामा आधारित गीतहरू मार्फत श्रोता(दर्शकको मन जित्दै आएकी छिन् ।

उनका जुग जाने पिरती, कति राम्री, बटौली सहर, माइती घरको आगनी जस्ता गीतले लाखौंको मन जितेका गित हुन् । संगीतप्रतिको उनको लगाव, निरन्तरता र मौलिकता नै उनी आजको पुस्ताको लागि प्रेरणादायी बनेकी छिन् । गायनमा मात्र होइन, कला संस्कृतिको जगेर्ना र प्रवद्र्धनमा पनि सक्रिय रहिआएकी क्षेत्रीले उक्त गीतको माध्यमबाट समकालीन तीज गीतहरूमा फरक र नयॉ स्वाद ल्याएको बताएकी छन् ।

गायिका दुर्गा क्षेत्री नेपालले भनेकी छिन् “तीज हाम्रो परम्परा र महिला आवाजको चाड हो । यसलाई मनाउन र महसुस गर्न सकिने किसिमको गीत दर्शकसामु ल्याउने प्रयास गरेंकी छु । ‘रे रे रे रे’ मेरो तर्फबाट सम्पूर्ण नेपाली आमाबुबा, दिदीबहिनीहरूलाई यो तीजको साङ्गीतिक कोसेली हो । ”