खोज

नवलपरासी, पश्चिम ।

बर्दघाट नगरपालिका ने आफ्नो क्षेत्रभित्र रहेका सार्वजनिक पोखरीहरूको संरक्षणका लागि गत आर्थिक वर्षदेखि समिति निर्माण गरी पोखरीहरूको अभिलेखिकरण गरेको छ।

नगरको क्षेत्राधिकारमा रहेका पोखरीहरूलाई स्थानीय क्लब संघ तथा संस्थाले प्रयोग गर्दै त्यसको संरक्षण गर्दै आएका थिए, तर हाल नगरपालिकाले ती पोखरीहरूलाई ठेक्का मार्फत व्यवस्थापन गर्न थालेको हो। नगरपालिका भित्र रहेका १८ ओटा पोखरीमध्ये ९ वटा पोखरी ठेक्का लागेको प्रमुख प्रशासकीय अधिकृत प्रकाश खनालले जानकारी दिएका छन्।

पोखरीहरूको संरक्षणलाई कृषि र उत्पादनसँग जोडेर आर्थिक उन्नति गर्न सकिने कुरा खनालले बताए।

नगरपालिकाले पोखरीहरूको ठेक्का मार्फत ठूलो आम्दानीको अपेक्षा नगरेर, सार्वजनिक पोखरीहरूको संरक्षणमा ध्यान केन्द्रित गर्न चाहेको र अतिक्रमणबाट रोकथाम गर्न पनि मद्दत पुग्ने कारणले निश्चित मापदण्ड बनाएर ठेक्का लगाइएको नगरप्रमुख शम्भुलाल श्रेष्ठले बताए। साथै, नगर प्रमुख श्रेष्ठले सार्वजनिक पोखरीहरूको संरक्षणका लागि बजेट बिनियोजन गरिएको पनि जानकारी दिए।

प्रत्येक पोखरीको ठेक्का मूल्य वार्षिक ५० हजारदेखि डेढ लाख रुपैयाँसम्म रहेको छ। अन्य ९ वटा पोखरीको ठेक्का आह्वान गरिएको छ। नगरपालिकाले सार्वजनिक पोखरीहरूमा अतिक्रमण गरेर बनाईएका संरचनाहरूलाई भत्काएको पनि जानकारी दिएको छ।