दाङ, ८ पुस ।
घोराही उपमहानगरपालिकाको १६ औं हिउँदे अधिबेशन शुरु भएको छ । नगर प्रमख नरुलाल चाैधरीले आर्थिक वर्ष २०८१-०८२ का लागि स्वीकृत केही याेजना तथा कार्यक्रम संशोधन तथा रकमान्तर गर्ने प्रस्ताव, साेही बमोजिम कानुन तथा नीति पेश गरेका छन् । जसमा अटाे रिक्सा संचालन तथा व्यवस्थापन सम्बन्धि कानुन २०८१, प्लास्टिकजन्य बस्तु प्रतिबन्ध विधेयक २०८१, दिशाजन्य लेदाे व्यवस्थापन सम्बन्धि नीति २०८१, अार्थिक ऐन २०८१ संशोधन प्रस्ताव पेश गरेका छन् ।
यसैगरी, कर्मचारी संगठन तथा व्यवस्थापन पुनरावलोकन प्रस्ताव, अार्थिक वर्ष २०७३-०७४ देखि २०७९-०८० सम्म महालेखा परिक्षकबाट औंल्याईएका बेरुजु फर्छ्याैटकाे प्रकृया अगाडि बढाउने प्रस्ताव पेश भएको छ ।
प्रस्तावित विषय अनुसार पालिकाकाे आर्थिक अवस्था राजस्वका विषयमा प्रमुख प्रशासकीय अधिकृत ऋषिराम केसीले जानकारी गराएका थिए ।
बजेटकाे प्रगति विवरण, आय, राजस्व संकलनकाे अवस्था तथा पूँजीगत खर्च बारे उनले जानकारी गराए । चालू आर्थिक वर्षकाे बाँकी रहेकाे समयमा राजस्व संकलनमा सुधार गर्न केही वडाले थप पहल गर्नुपर्ने, पूँजीगत खर्च बढाउँदै चालू खर्चमा कटाैती गर्ने प्रयासमा रहेकाे बताए । पालिकामा ४९८ दरबन्दी रहेकाे कर्मचारीलाई व्यवस्थापन गर्न समान प्रकृति र उद्देश्य भएका शाखा गाभेर कर्मचारी कटौती गर्ने र ४ सय १५ मा झार्ने काेशिस भईरहेकाे बताए । बढ्दाे बेरुजु घटाउन चुस्त आर्थिक कृयाकलापलाई ध्यानमा राखेर कार्यदल गठन गरिएको बताए ।
नगर सभामा प्रस्ताव गरिएको विषयमा अध्ययन गरि छलफलका लागि समय दिईएकाे छ । नगर सभामा उपप्रमुख हुमा डिसीसहित नगर सभा सदस्यहरुकाे सहभागीता रहेकाे छ ।
नगर सभाकाे अर्काे बैठक पुस १७ गते बिहान ११ बजेका लागि राखिएको छ । नगर सभा बसेकाे ६ महिना नबित्दै अर्काे नगर सभा बस्न सक्ने प्रावधान अनुसार हिउँदे नगर सभा आयाेजना गरिएको हाे ।
२७ मंसिर २०८२, शनिबार
