खोज

सुनवल, १५ साउन ।

पश्चिम नवलपरासीको पाल्हीनन्दन गाँउपालिकाले नयाँ आर्थिक वर्ष सुरु भएको १५ औँ दिनमा बल्ल नीति तथा कार्यक्रम र बजेट सार्वजनिक गरेको छ । असार १० भित्रै नीति तथा कार्यक्रम र बजेट ल्याउनुपर्ने संवैधानिक व्यवस्था भएपनि आन्तरिक विवादका कारण पाल्हीनन्दनमा आर्थिक वर्ष २०८१÷०८२ को अनुमानित आय व्यय विवरण प्रस्तुत हुन सकेको थिएन । मंगलबार आयोजित १७ औँ गाउँसभामा अध्यक्ष वैजु प्रसाद गुप्ताले नीति तथा कार्यक्रम प्रस्तुत गरेपछि उपाध्यक्ष फातिमा खातुन अन्सारीले बजेट प्रस्तुत गरेकी छन् ।

सामुदायिक विद्यालयको शैक्षिक गुणस्तर सुधार, सुशासन प्रवद्र्धन, कृषिमा किसान सहयोगी विभिन्न कार्यक्रमलाई प्राथमिकता दिदै गाँउपालिकाले ५२ करोड ९२ लाख ५३ हजार रुपैयाँ बराबरको अनुमानित बजेट सार्वजनिक गरेको छ । उक्त बजेट अन्तर सरकारी अख्तियारी बाहेकको बजेट भएको गाउँपालिकाका लेखा अधिकृत दिनानाथ ढकालले बताए । सशर्त, समपुरक र विशेष अनुदान बाहेक कुल २७ करोड ९५ लाख बजेटमा चालु तर्फ ५६ दशमलव ५ प्रतिशत र विकास बजेट ४३ दशमलव ३ प्रतिशत विनियोजन गरिएको छ ।

वडाको बजेटकै विषयमा कुरा नमिलेपछि गाउँ सभा हुन सकेको थिएन । प्रस्तुत बजेटमा ६ वटा वडालाई एक करोडका दरले बजेट विनियोजन गरिएको छ । वडालाई ६ करोड, कार्यालय संञ्चालन तथा प्रशासनिक खर्चका लागि ९ करोड, शाखागत कार्यक्रम तथा खर्च बापत ४ करोड, समपुरक कोष १ करोड ४० लाख, विभिन्न कोषका लागि ३० लाख, पालिका अन्तर्गतका योजनाका लागि ५ करोड २५ लाख र अघिल्लो वर्षबाट आएका योजनाका लागि २ करोड बजेट विनियोजन गरिएको छ । चालु आर्थिक वर्षमा २ करोड आन्तरिक आम्दानी हुने अनुमान गरिएको छ ।

अध्यक्ष गुप्ताले आन्तरिक विवाद, कर्मचारी अभाव लगायतका समस्याका कारण समयमै नीति तथा कार्यक्रम र बजेट ल्याउन नसकेपनि आज प्रस्तुत बजेट कार्यान्वयनमा जोड दिने बताए ।

स्थानीय तह सरकार सञ्चालन ऐन २०७४ को दफा ७१ को उपदफा १ अनुसार स्थानीय तहले कार्यपालिकाबाट स्वीकृत गराई प्रत्येक असार १० गते सभामा पेश गर्नुपर्ने प्रावधान छ । दफा ६ अनुसार असार मसान्तभित्र प्रत्येक आर्थिक वर्षको बजेट पारित गर्नुपर्ने उल्लेख छ । बजेट पारित नगरी खर्च गर्न पाइँदैन । संवैधानिक व्यवस्थाअनुसार बजेट ल्याउन असफल भएपछि पालिकाले गर्ने खर्च गैरकानुनी र बेरुजु हुन्छ । नवलपरासीका अन्य ६ स्थानीय तहले भने समयमै नीति तथा कार्यक्रम र बजेट पारित गरिसकेका छन् ।