खोज

बुटवल,१९ असार ।   बुटवल ११ को प्रगतिनगर खानेपानी तथा सरसफाइ संस्थाको अधिवेशन गर्न माग गर्दै टोल विकास संस्था तथा उपभोक्ताहरुको समूहले प्रमुख जिल्ला अधिकारी गणेश अर्याल सहित पांच वटा निकायलाई ज्ञापनपत्र बुझाएका छन् ।

२०६४ सालयता साधारणसभा र अधिवेशनन नभएकाले ३५ दिनभित्र साधारणसभा तथा अधिवेशन सम्पन्न गर्न माग गर्दै उनीहरुले प्रमुख जिल्ला अधिकारी,बुटवल उपमहानगरपालिका,खानेपानी डिभिजन कार्यालय बुटवल, बुटवल ११ वडा कार्यालय र प्रगतिनगर खानेपानी तथा सरसफाइ संस्थामा ज्ञापनपत्र बुझाएका छन् ।

शुरुमा बिसी टोल विकास संस्थाका अध्यक्ष विरबहादुर कुँवरको संयोजकत्वमा विभिन्न टोल विकास संस्थाका अध्यक्ष, प्रतिनिधि तथा उपभोक्ताहरुले खानेपानी संस्थाका सहसचिव टिकाराम सुनार र प्रशासन प्रमुख निर्मला पाण्डेलाई ज्ञापनपत्र बुझाएका हुन् ।

२०६४ भदौ १५ गते साधारण सभा गरेको संस्थाले त्यस यता १५ वर्षसम्म पनि साधारण सभा र अधिवेशन नगरेको हुंदा अधिवेशन गर्न अनुरोध गर्दा समेत बेवास्ता गर्दै आएकाले उपभोक्ताहरुका प्रतिनिधी र टोल विकास संस्थाहरुको बैठक बसी ३५ दिन भित्र साधारण सभा तथा अधिवेशन गर्नका माग गर्ने निर्णय अनुसार ज्ञापनपत्र बुझाइएको एफ सेक्टर टोल विकास संस्थाका अध्यक्ष टेकबहादुर गुरुङले बताए ।

प्रमुख जिल्ला अधिकारी गणेश अर्यालले लामो समयसम्म अधिवेशन नगर्नु गैर कानुनी भएको भन्दै आफूले यथाशीघ्र अधिवेशन गर्न निर्देशन दिने जानकारी आफूहरुलाई गराउनुभएको अध्यक्ष गुरुङले बताए ।
लामो समयसम्म संस्थाको साधारणसभा तथा अधिवेशन नहुँदा आर्थिक अनियमिततासमेत भएको हुनसक्ने उपभोक्ताको आशंका रहेको संयोजक विरबहादुर कुंवरले बताए ।

ज्ञापनपत्र बुझाउन जांदा खानेपानी संस्थाका अध्यक्ष जितबहादुर मल्ल निकट केही व्यक्तिहरुले अवरोध र विवाद गर्न खोजेका कुंवरले बताए ।
उता अध्यक्ष मल्लले २०६७ सालदेखि साधारणसभा तथा अधिवेशन हुन नसकेको स्वीकार गर्दै तीनपटक साधारणसभा तथा अधिवेशन गर्ने निर्णय भएपनि बिभिन्न कारणले सम्पन्न गर्न नसकिएको बताए । भुकम्प, कोरोना महामारी लगायतका कारण अधिवेशन सम्पन्न गर्न नसकिएको उनले बताए ।
संस्थाले संरक्षण गरी राखेको जग्गामा बुटवल उपमहानगरपालिकाले हस्तक्षेप गरेपछि उच्च अदालन तुलसीपुर बुटवलमा मुद्दा दर्ता भएको र अन्तिम फैसला आइनसकेकोले संस्थाले अहिले कुनैपनि कार्यक्रम नगरेको अध्यक्ष मल्लले बताए । अन्तिम फैसला आइसकेपछि साधारणसभा तथा अधिवेशन गर्ने भनेर निर्णय भइसकेको समेत उनले बताए । २०६२ सालमा स्थापना भएको संस्थामा हाल २ हजार ६४५ घरधुरी उपभोक्ता रहेका छन् ।