खोज

दाङ, १० असार ।

घोराही उपमहानगरपालिकाले पूर्वाधार, कृषि, शिक्षा, सामाजिक विकासलगायत क्षेत्रलाई प्राथमिकता दिँदै आगामी आर्थिक वर्ष २०८१–०८२ का लागि २ अर्व ४२ करोड बढी बजेट सार्वजनिक गरेको छ । नगर उपप्रमुख एवम् कार्यक्रम तथा बजेट तर्जुमा समिति संयोजक हुमाकुमारी डिसीले आइतबार पन्ध्रौँ नगरसभामा आगामी आर्थिक वर्षका लागि २ अर्ब ४२ करोड ७७ लाख १८ हजार रुपैयाँको बजेट सार्वजनिक गरिन् ।

घोराहीले चालु आर्थिक वर्षभन्दा २६ करोड ९४ लाख १८ हजार रुपैयाँ बढीको बजेट ल्याएको छ । घोराही उपमहानगरपालिकाले आर्थिक वर्ष २०८०–०८१ का लागि २ अर्व १५ करोड ८३ लाख रुपैयाँ बजेट बिनियोजन गरेको छ ।

नगर सभामा उपप्रमुख एवम् कार्यक्रम तथा बजेट तर्जुमा समिति संयोजक डिसीले कुल बिनियोजित रकम मध्ये संघ सरकारबाट प्राप्त हुने सशर्त अनुदान ८२ करोड ९७ लाख ५८ हजार मध्ये ११ करोड ६३ लाख २० हजार अर्थात १४ दशमलव ०२ प्रतिशत पूँजीगत खर्च र ७१ करोड ३४ लाख ३८ हजार अर्थात ८५ दशमलव ९८ प्रतिशत चालु खर्च रहेको बताइन् ।
त्यस्तै प्रदेश सरकारवाट प्राप्त हुने सशर्त अनुदान ३ करोड ६४ लाख ६२ हजार मध्ये ३ करोड ६० लाख अर्थात ९८ दशमलव ७३ प्रतिशत पूँजीगत खर्च र ४ लाख ६२ हजार अर्थात १ दशमलव २७ प्रतिशत चालु खर्च रहेको छ । संघ तथा प्रदेश सरकारबाट प्राप्त वित्तीय समानिकरण अनुदान, राजश्व बाँडफाँड र रोयल्टी तथा उपमहानगरपालिकाको आन्तरिक आय घर जग्गा रजिष्ट्रेशन, बैंक मौज्दात समेतबाट विनियोजन गरिएको बजेट १ अर्ब ५६ करोड १४ लाख ९८ हजार मध्ये ५५ करोड ७१ लाख १२ हजार अर्थात ३५ दशमलव ६८ प्रतिशत चालु खर्च र १ अर्ब ४३ लाख ८६ हजार अर्थात ६४ दशमलव ३२ प्रतिशत पूँजीगत खर्च रहेको उपप्रमुख डिसीले जानकारी दिइन् ।

प्रस्तुत भएको कुल बजेटमध्ये १ अर्ब २७ करोड १० लाख १२ हजार अर्थात ५२ दशमलव ३५ प्रतिशत चालु खर्च र १ अर्व १५ करोड ६७ लाख ६ हजार अर्थात ४७ दशमलव ६५ प्रतिशत पूँजिगत खर्च रहेको छ ।

आगामी आर्थिक वर्षको खर्च व्यहोर्ने स्रोत मध्ये आन्तरिक आयबाट ५५ करोड ८८ हजार, संघीय वित्तीय समानिकरण अनुदानबाट ३० करोड ३१ लाख, संघीय राजश्व बाँडफाँडबाट २६ करोड ७० लाख २६ हजार ६०१, संघीय रोयल्टी बाँडफाँडबाट ९ लाख ७३ हजार ३९९ संघीय सशर्त अनुदानबाट ८२ करोड २२ लाख ५८ हजार र संघीय बिशेष अनुदानबाट ७५ लाख व्यहोरिने भएको छ ।

त्यस्तै प्रदेश समानिकरण अनुदानबाट २ करोड २० लाख ४७ हजार, प्रदेश राजश्व बाँडफाँडबाट २ करोड ८२ लाख ६३ हजार, प्रदेश सशर्त अनुदानवाट २ करोड २४ लाख ६२ हजार र प्रदेश समपुरक अनुदानबाट १ करोड ४० लाख व्यहोरिने गरी उपमहानगरले बजेट विनियोजन गरेको हो ।

कुन क्षेत्रका लागि कति बजेट ?

घोराही उपमहानगरपालिकाले आगामी आर्थिक वर्ष २०८१–०८२ का लागि सार्वजनिक गरेको २ अर्व ४२ करोड बढी बजेटमध्ये सामाजिक विकास महाशाखा अन्तर्गत शिक्षा, विद्यालय पूर्वाधार विकास तथा मर्मत एवम् खेलकुदका सबै कार्यक्रमका लागि ८४ करोड ८४ लाख ४७ हजार रुपैयाँ विनियोजन गरेको छ । पूर्वाधार विकास अन्तर्गत ८१ करोड ५३ लाख ४५ हजार रुपैयाँ विनियोजन गरेको छ ।

यसैगरी स्वास्थ्य प्रवद्र्धन अन्तर्गत ९ करोड २६ लाख ८५ हजार रुपैयाँ, कृषि प्रवद्र्धन अन्तरगत ३ करोड २ लाख ७५ हजार रुपैयाँ, वन वातावरण तथा विपद व्यवस्थापन अन्तर्गत २ करोड ५ लाख ७५ हजार रुपैयाँ, आर्थिक विकास अन्तर्गत २ करोड ६० लाख रुपैयाँ, उपभोक्ता हित संरक्षण शाखा अन्तर्गत १६ लाख ९५ हजार रुपैयाँ, सहकारी तथा रोजगार प्रवद्र्धन अन्तर्गत १० लाख २५ हजार रुपैयाँ विनियोजन गरेको छ ।

उद्योग प्रवद्र्धन अन्तर्गत २१ लाख ५० हजार रुपैयाँ, सूचना तथा संचार प्रविधि अन्तर्गत ७० लाख १५ हजार रुपैयाँ, पर्यटन तथा संस्कृति प्रवद्र्धन अन्तर्गत १४ लाख ७५ हजार रुपैयाँ, महिला बालबालिका तथा समाज कल्याण अन्तर्गत ९८ लाख ३० हजार रुपैयाँ, कानूनी मामिला अन्तर्गत २२ लाख ६० हजार रुपैयाँ, पशु सेवा अन्तर्गत ५३ लाख ८० हजार रुपैयाँ, सरसफाई व्यवस्थापन अन्तर्गत ३ करोड ५३ लाख ४५ हजार रुपैयाँ, भूमि व्यवस्थापन अन्तर्गत ५५ लाख २२ हजार रुपैयाँ विनियोजन गरेको छ ।

सामान्य व्यवस्थापन अन्तर्गत १८ लाख रुपैयाँ, योजना तथा अनुगमन अन्तर्गत १० लाख, राजश्व व्यवस्थापन अन्तर्गत १३ लाख रुपैयाँ, सामाजिक सुरक्षा तथा पञ्जीकरण अन्तर्गत १० लाख ८० हजार रुपैयाँ, भवन अनुमति तथा मापदण्ड अन्तर्गत १२ लाख रुपैयाँ, आन्तरिक प्रशासन अर्थात कर्मचारीको तलव भत्ता, ईन्धन, सवारी साधन मर्मतसम्भारदेखि सेवा सुविधा अन्तर्गत ३६ करोड रुपैयाँ विनियोजन गरेको छ ।

पालिकाको बहुवर्षीय तथा क्रमागत नयाँ तथा पुराना ७० वटा योजनाका लागि ५० करोड ९४ लाख रुपैयाँ विनियोजन गरेको छ । यसैगरी नगरस्तरीय लागत सहभागितामा आधारित ७२ वटा योजनाका लागि ६ करोड ८ लाख रुपैयाँ विनियोजन गरेको उपप्रमुख डिसीले बताइन् ।

असार २ गते नीति तथा कार्यक्रम प्रस्तुत गरेर आज बजेट ल्याएको घोराहीले चालु आर्थिक वर्षको तुलनामा बजेटको आकार केही बढाएको छ । बजेटमाथिको छलफलका लागि ११ गते बिहान ७ बजे नगरसभाको बैठक बोलाईएको छ ।