खोज

सुनवल, ६ वैशाख ।

पश्चिम नवलपरासीको प्रतापपुर गाउँपालिकाले जनताका गुनासो सुन्ने र योजनाको प्राथमिकीकरण गर्न जनतासंग जनप्रतिनिधि कार्यक्रम सुरु गरेको छ । अध्यक्ष उमेशचन्द्र यादवको नेतृत्वमा जनतासंग जनप्रतिनिधि कार्यक्रम सुरु भएको हो । दुई वर्षको अवधिमा गाउँपालिका मार्फत भएका कामको जनताबाट समीक्षा र अब गर्नुपर्ने कामको जनताकै आवश्यकताका आधारमा योजना तय गर्न जनता संग जनप्रतिनिधि कार्यक्रम सुरु गरेको अध्यक्ष यादवले बताए ।

सो क्रममा प्रतापपुर गाउँपालिकाका ९ वटा वडाका ८३ वटा टोलमा पुगेर जनताको गुनासा र सुझाव संकलन गर्ने गर्न कार्यक्रम छ । टोलटोलमा जनप्रतिनिधि पुगेपछि स्थानीयहरुले आफ्ना गुनासा जनप्रतिनिधि समक्ष राखेका छन् । स्थानीयले सबैभन्दा बढी शुद्ध पिउने पानीको समस्याको समाधान गर्न गाउँपालिकाको ध्यानाकर्षण गराएका छन् । यस्तै सडक निर्माण, सिचाइँ, विद्युतीकरण, रासायनिक मलको अभाव लगायतका समस्या समाधानका लागि पनि जनप्रतिनिधिको स्थानीयबासीले ध्यानाकर्षण गराएका छन् ।

अध्यक्ष यादवले खानेपानीको समस्या बढी देखिएकाले त्यसको समाधानका लागि प्राथमिकता दिने बताए । “बजेट निर्माणको प्रक्रिया पनि सुरु भईसकेकाले त्यसमा पनि सहजीकरण होस् भन्ने उद्देश्यले यो कार्यक्रम गरिएको हो”–अध्यक्ष यादवले भने, “हामी बजेट निर्माणमा स्थानियले राखेका मागका आधारमा कार्यक्रम तय गर्छो ।”

जनप्रतिनिधिको टोली यही वैशाख १२ गते सम्म टोलटोलमा पुगेर जनताका गुनासा र सुझाव संकलन गर्ने छ । त्यस क्षेत्रको समस्याका बारेमा तपाई आफै जानकार हुनुहन्छ अनि किन अभियानको रुपमा टोलटोलमा पुग्नुपर्यो भन्ने जिज्ञासामा अध्यक्ष यादवले जनताको सुझाव संगै दुई वर्षे अवधिको समिक्षाको रुपमा पनि यो अभियान सुरु गरेको बताए ।

‘कतिपयले यसलाई नकारात्मक रुपमा टिप्पणी गरेका छन् तर हामीले यसलाई बिशुद्ध जनता संग उनीहरुको घरदैलोमै पुगेर दई वर्षे कार्यकालको समीक्षा र आगामी कार्यनीति तय गर्ने कार्यक्रमको रुपमा लिएका छौ’, अध्यक्ष यादवले भने ।