खोज

बुटवल ।

बुटवल उपमहानगरपालिका स्थानीय विकास कोष सञ्चालन समितिको आयोजनामा शुक्रबारदेखि समूहमा आवद्ध महिलाहरूका लागि उद्घोषण, बैठक सञ्चालन, माइन्युट लेखन तथा लेखा ब्यवस्थापन सम्बन्धी तालिम सुरु भएको छ ।

तालिमको बुटवल– १७ को भाटामा शुक्रबार एक कार्यक्रमका बिच बुटवल उपमहानगरपालिकाका नगर प्रमुख खेलराज पाण्डेले उद्घाटन गरेका हुन् ।

कार्यक्रमको उद्घाटन गर्दै नगर प्रमुख पाण्डेले नगरका ग्रामीण क्षेत्रका महिलाहरूलाई सीप र उत्पादनसँग जोडेर जिवनस्तर माथि उठाउने उदेश्यले कार्यक्रम सञ्चालन गरिएको बताए ।

नगरवासीलाई सीप र उत्पादनसँग जोडेर आय आर्जन बृद्वि गराउने उद्देश्यले उपमहानगरपालिकाले विभिन्न किसिमका कार्यक्रम सञ्चालन गरेको बताउँदै नगर प्रमुख पाण्डेयले आत्मनिर्भर बन्न जस्तोसुकै सीपमूलक तालिम दिन उपमहानगरपालिका तयार रहेको जानकारी गराए ।

बुटवल उपमहानगरपालिका वडा नं १४ देखि १९ सम्मका लागि सञ्चालित कार्यक्रम यो कार्यक्रमले ती वडाका जनताको जिवनस्तर माथि उठाउन महत्त्वपूर्ण हुने विश्वास ब्यक्त गर्दै उनले कार्यक्रमबाट लाभ लिन आग्रह गरे ।

कार्यक्रममा उपप्रमुख सावित्रा अर्यालले नाम जे भए पनि यो कार्यक्रम गरिबी निवारण कोष भएको भन्दै ्यसको उद्देश्य महिला सशक्तिकरण र गरिबी निवारण गर्नु रहेको बताइन् ।

निम्न वर्गका मानिसहरूले उठाएको रकम सस्तो दरमा उनै समुदायमा परिचालन गरेर उद्ममशील बनाउने योजना अनुसार कार्यक्रम सञ्चालन भएको बताउँदै उनले सबै घरका महिलालाई कुने न कुनै सीपसँग जोडेर आत्मनिर्भर बनाउने उपमहानगरपालिकाको योजना रहेको उल्लेख गरिन् ।

बुटवल उपमहानगरपालिकाका प्रवक्ता समेत रहेका स्थानीय विकास कोष सञ्चालन समितिका अध्यक्ष शिव रानाले कोषमा आवद्ध विभिन्न सामुदायिक संस्था र उक्त संस्थाका सदस्यहरूको संगठन, बचत र सीप विकासको माध्यमबाट सामाजिक रूपान्तरण प्रक्रियालाई अगाडि बढाई मध्यम तथा बिपन्न बर्गका नागरिकहरूलाई आफ्नो काम, कर्तव्य तथा हक, अधिकारका बारेमा सचेत गराउनुका साथै सामाजिक परिचालन मार्फत विकासको मूल प्रवाहमा ल्याउन कार्यक्रम प्रभावकारी हुने विश्वास ब्यक्त गरे ।

बुटवल उपमहानगरपालिका भित्र ६० सामुदायिक संस्था करिब १५ सय सदस्य कोषमा आवद्ध रहेको जानकारी गराउँँदै उनले संस्थाका सदस्यहरूको आय आर्जन बृद्धि गर्न पशुपालन ब्यापार ब्यवसाय सञ्चालनका लागि न्युनतम ब्याजदरमा घुम्ती कोषको रूपमा ऋण पुँजी लगानी गरेको बताए ।

त्यसका अलावा कोषले सदस्यहरूको विभिन्न रचनात्मक तथा ब्यावहारिक र सैद्धान्तिक क्रियाकलापमा सहभागी गराई उनीहरूको दक्षता र क्षमताको विकास गराई थप उर्जाशील, चेतनशील एवं सक्रिय जिवनयापनका लागि उद्घोषक, बैठक सञ्चालन, माइन्युट लेखन तथा लेखा ब्यवस्थापन तालिम सञ्चालन गरिएको उनले बताए ।

कार्यक्रममा बुटवल उपमहानगरपालिका वडा नं १९ वडा अध्यक्ष चन्द्र सि थापा, कोष सञ्चालन समिति सदस्य प्रेमनारायण पाण्डेलगायतले कार्यक्रमको उद्देश्य र औचित्यबारे जानकारी गराएका थिए ।

दुई चरणमा गरी तालिममा १२० जनाको सहभागी रहेको कार्यक्रमको सहजीकरण गरेका दीपु मगरले जानकारी दिए ।