खोज

दाङ, ३ फागुन ।

तुलसीपुर उपमहानगरपालिकाले सुकुम्बासी, अव्यवस्थित बसोबासीका लागि जग्गा नाप नक्साङ्कनको कामलाई तीब्र पार्न जनशक्ति थप गर्ने भएको छ । चौधौँ नगर सभाले जनशक्ति थप गर्ने निर्णय गरेको हो । आयोगबाट पठाइएको जनशक्तिले हालसम्म एउटा वडाको काम समेत सम्पन्न गर्न नसकेपछि सभाले १९ वटै वडाको कामलाई छिटो छरितोरुपमा सम्पन्न गर्नका लागि जनशक्ति थप गर्ने निर्णय गरेको हो ।

तुलसीपुर उपमहानगरपालिका वडा नम्बर ६ मा ४५ बिघा क्षेत्रफल जग्गाको नाप नक्साङ्कनको काम सम्पन्न भएको छ । वर्षौ समय लाग्ने भएपछि सभाबाट थप जनशक्ति व्यवस्थापन गरेर काम अघि बढाउने निर्णय गरिएको नगरप्रमुख टीकाराम खड्काले बताए । सभाले नगर प्रहरी ऐन संशोधन गरी भर्नाका लागि समेत बजेट सुनिश्चित गरेको छ । सभामा नगरप्रमुख टीकाराम खड्काले दलित सशक्तिकरण ऐन कार्यान्वयनको चरणमा रहेको बताए । उनले ऐन कार्यान्वयनका लागि समितिलाई पूर्णता र बजेटको व्यवस्थापन गरिएको बताए ।

आर्थिक विकास समितिका संयोजक माधव वलीले आर्थिक ऐन संशोधन गरी राजस्व संकलनको दायरा बढाइएको बताए । सभामा संयोजक वलीले आर्थिक, पर्यटन, उद्यमको क्षेत्रमा नयाँपन दिलाउन खोजिएको बताए । उनले नव उद्यमी प्रोत्साहन, उद्यमी केन्द्र सञ्चालनका लागि बजेट सुनिश्चिता गर्दै कार्यान्वयनमा ल्याउन थालिएको बताए ।

सामाजिक विकास समितिका संयोजक मानबहादुर रावतले शिक्षा क्षेत्रमा क्रमशः सुधार गर्दै लगिएको बताए । उनले कक्षा १ देखि ८ सम्म स्थानीय पाठ्यक्रम निर्माण र कक्षा ४ देखि आठसम्म पाठ्यपुस्तक निर्माण गरी कार्यान्वयनमा लगिएको बताए । संयोजक रावतले विगतमा विद्यार्थी संख्या कम भए गाभिएका विद्यालयमा समेत विद्यार्थी संख्या बढाएर सञ्चालन गरिएको बताए । सभामा विधायन समितिका संयोजक भीमबहादुर कँवरले तुलसीपुर उपमहानगरपालिकाको खानेपानी तथा सरसफाई व्यवस्थापन ऐन पारित गरिएको बताए । ऐन पारित भएसँगै तुलसीपुर क्षेत्रमा खानेपानी बोर्ड गठन, व्यवस्थापन हुने भएको छ । संयोजक कुवरका अनुसार अहिलेसम्म एक सय ६१ वटा ऐन कानुन निर्माण गरेको छ । संयोजक कुवरका अनुसार आर्थिक वर्ष २०८०÷८१ मा पर्यटन विकास कार्यविधि, तुलसीपुर उपमहानगरपालिकाको कर्मचारी व्यवस्थापन मापदण्ड, एकीकृत डाटा व्यवस्थापन प्रणाली सञ्चालन कार्यविधि समेत पारित गरिएको गरिएको छ । विपद् तथा वनवातावरण समितिका संयोजक दुजमान भण्डारीले बजार क्षेत्रमा सौन्दर्यकरण,गल्ने फोहोरबाट कम्पोष्ट मल उत्पादन सुरु गरिएको बताए । उनले प्लाष्टिकजन्य वस्तुबाट नयाँ सामग्री उत्पादनका लागि उद्यमी समूहमार्फत् काम बढाइएको बताए ।