खोज

दाङ, २० कात्तिक ।

घोराही उपमहानगरपालिकाको न्यायिक समितिले चालू आर्थिक वर्षको पहिलो त्रैमासमा ३९ प्रतिशत न्याय सम्पादन गरेको छ । उपमहानगरको कानुनी मामिला शाखाले सोमबार पत्रकार सम्मेलन गरी चालू आर्थिक वर्षको साउनदेखि असोजसम्म परेको कुल ७४ वटा उजुरीमध्ये २९ वटा विवाद मिलापत्र गर्न सफल भएको जनाएको छ । यो कुल विवादको उजुरीमध्ये ३९ प्रतिशत मिलापत्र रहेको छ । पछिल्लो समय पालिकाको न्यायिक समितिमा उजुरी पर्नेको संख्या पनि घट्दै गएको पाईएको छ ।

पत्रकार सम्मेलनमा स्थानीय सरकार संचालन ऐन २०७४ को दफा १ बमोजिम उजुरी परेका १५ वटा र दफा २ बमोजिम उजुरी परेका १२ वटा र अन्य उजुरी अन्तरगत लेनदेन, घरायसी, झैझगडा, अंश, ऐलानी जग्गा विवाद १४ वटा र आर्थिक वर्ष २०७९–०८० बाट जिम्मेवारी सरी आएको ३३ वटा विवाद गरि कल ७४ वटा विवाद मध्ये २९ वटा विवाद दुवै पक्षलाई जीत– जीतको वातावरण बनाउँदै मिलापत्र गराउन सफल भएको जानकारी गराईएको छ । अब ४५ वटा विवाद मिलापत्र गर्न बाँकी रहेको रफती मुद्दाको सुनुवाई प्रकृयामा रहेको न्यायिक समिति संयोजक एवम् उपप्रमुख हुमा डिसीले बताइन् ।

न्यायिक समिति संयोजक डिसीले दफा १ अनुसार आलीधुर, बाँध शीर्षकमा १ वटा, ज्याला मजदुरी नदिएको २ वटा, ज्येष्ठ नागरिक पालन पोषण तथा हेरचाहको १ वटा, नाबालक छोराछोरी वा पति पत्नीलाई खान लाउन, शिक्षा दीक्षा नदिएको ८ वटा, घर बहाल सुविधा २ वटा, संघियार जग्गा विवाद १ वटा गरि १५ वटा र दफा २ अनुसार, सरकारी सार्वजनिक जग्गा मिचेको ३ वटा, सार्वजनिक जग्गामा संरचना बनाएको ४ वटा, गाली बेईज्जती ३ वटा, अरुको जग्गा भोगचलन गरेको २ वटा गरी १२ वटा विवाद सम्बन्धी मुद्दा न्यायिक समितिमा पछिल्लो तीन महिनामा उजुरी परेका छन् ।

जसमा दफा १ बमोजिमको १५ उजुरी मध्ये ८ वटा फछ्र्यौट भएको छ । ७ वटा प्रकृयामा रहेको छ । दफा २ बमोजिमको १२ वटा उजुरी परेको र २ वटा मिलापत्र भएको छ । १० वटा विवाद प्रकृयामा रहेको छ । गत वर्षको जिम्मेवारी सरी आएको ३३ वटा विवादमध्ये १७ वटा मिलापत्र भएको र १६ वटा अझै प्रकृयामा रहेको छ ।

न्यायिक समितिले सम्पादन गर्दै आएको काममा वडा अध्यक्ष, टोल विकास संस्था, सरोकार निकायको भूमिका अहम् रहेको नगरप्रमुख नरुलाल चौधरीले बताए । उनले समुदायमा जटिल अवस्थामा रहेका पीडितलाई न्याय दिन सफल भएको हुँदा धेरै पीडितले नयाँ जीवनको थालनी गरेको बताए ।

सो अवसरमा न्यायिक समिति संयोजक डिसीले वडा तहबाट पनि न्याय दिने काम भईरहेको बताउँदै त्यहाँ पनि सम्भव नभए पालिकाको न्यायिक समितिबाट नगरबासीलाई छिटो छरितो रुपमा न्याय दिने काम भईरहेको बताइन् ।

सो अवसरमा, प्रमुख प्रशासकीय अधिकृत ऋषिराम केसी, कानुनी सल्लाहकार भुपबहादुर केसी, नेपाल पत्रकार महासंघ दाङ शाखा अध्यक्ष दुर्गालाल केसीलगायत बोलेका थिए ।

उनीहरुले न्यायिक समितिले गर्दै आएको कामले पीडित बनेका थुप्रै नगरबासीले सहज रुपमा न्याय पाउन सफल भएको र सेवा प्रवाहलाई थप प्रभावकारी बनाउन सबैको सकारात्मक भूमिका हुनुपर्नेमा जोड दिएका थिए । कार्यक्रमको सहजीकरण कानुनी मामिला शाखा प्रमुख प्रतलाकुमारी देवकोटाले गरेकी थिइन् ।