खोज

कन्चन, २० कात्तिक ।

रुपन्देहीको कञ्चन गाउँपालिकाले सबै योजना सम्झौता वडाबाट गर्ने उद्देश्यका साथ घुम्ती शिविर सञ्चालन गरेको छ ।

घुम्ती शिविरको उद्घाटन गर्दै कञ्चन गाउँपालिकाका अध्यक्ष नवराज ढकालले अघिल्लो बर्ष भए गरेका कमी कमजोरीलाई सुधार गदै लैजाने प्रकृयामा जेठ असारमा हुने सम्झौतालाई गत बर्ष चैत्र सम्म अनिवार्य गर्नुपर्ने बनाएको बताउँदै यस बर्ष त्यसलाई अझै सुधार गर्दै भदौ भित्र उपभोक्ता समिति गठन, असोजमा समितिलाई तालिम कात्तिक भित्र सम्झौता सम्पन्न गर्ने योजना अनुरुप घुम्ति शिविर सञ्चालन गरिएको बताए ।

आर्थिक बर्षको अन्तिममा हतार हतारमा योजना सम्झौता गर्ने गुणस्तरीय काम नगर्ने प्रबृत्तिलाई निरुत्साहित गर्न घुम्ती शिविर मार्फत नै योजना सम्झौता गर्ने लागिएको कञ्चन गाउँपालिकाका ईञ्जिनियर सुबोध ज्ञवालीले बताए ।

वडाबाटै योजना सम्झौता हुँदा सानो योजनालाई पनि सम्झौता गर्न गाउँपालिका जानुपर्ने बाध्यता हटेको र समयको साथै पैशाको पनि बचत हुने स्थानीयको भनाई रहेको छ । पालिकाले ल्याएको वडा बाटै योजना सम्झौता गर्ने कार्यक्रमले उपभोक्ता समितिमा बसेर काम गर्नेलाई धेरै सहज भएको शिविरमा सहभागी स्थानीयहरुले बताए ।

कञ्चन गाउँपालिकाले यस बर्ष समयमै योजना सम्पन्न गर्नको लागि भदौ भित्र उपभोक्ता समिति गठन, असोज भित्र समितिलाई तालिम र कात्तिक भित्र योजना सम्झौता सम्पन्न गर्ने योजना ल्याएको छ । त्यसै अनुसार २० गते वडा नं. १ को कार्यालयमा, २१ गते वडा नं. ४ को कार्यालय, २२ गते वडा नं. ३ को कार्यालय, २३ गते वडा नं. ५ को कार्यालय र २४ गते वडा नं. २ का कार्यालयमा योजना सम्झौता शिविर सञ्चालन हुने पालिकाले जनाएको छ ।

शिबिर उद्घाटनमा गाउँपालिकाकी उपाध्यक्ष मौसमी थापा मगर, योजना शाखा प्रमुख चिन्तामणि घिमिरे, ईन्जिनियर सुबोध ज्ञवाली, कञ्चन गाउँपालिका वडा नं. १ का अध्यक्ष हरिनारायण थारु, वडा सदस्य रेखा राहादीलगायतले बोलेका थिए ।