खोज

चन्द्रौटा(कपिलवस्तु) ५ असोज ।

शिवराज नगर प्रमुख अजय थापाले जनतालाई प्रत्यक्ष महसुस हुनेगरी जनशक्ति खटाइ गाउँघरमा पुगी सामाजिक सुरक्षा भत्ता दिइरहेको बताएका छन् । कपिलवस्तुको शिवराज नगरपालिका–१, शिवपुरमा शुक्रबार आयोजित घटना दर्ता तथा सामाजिक सुरक्षा भत्ता विषयक अन्तरक्रिया कार्यक्रम उनले यस्तो बताएका हुन् ।

जनप्रतिनिधिहरु निर्वाचनको बखत गरेका बाचा अनुसार आफू कार्यक्रम अघि सारे पनि सफल बनाउन एमआइएस अपरेटरहरुको महत्वपूर्ण भूमिका रहेको उनले बताए । अति अशक्त, अपांग तथा वृद्धवृद्धालाई लामो समय लगाएर बैंकमा लाइन, सवारीको पहुँच  नभएका स्थानमा बैंक र जनप्रतिनिधि घरमै पुग्दा सन्तुष्टि हुने गरेको उनको भनाई छ । मार्ग दर्शक अपरेटर नै रहेकोले सम्बन्धित पालिकामा सकरात्मक भुमिका खेल्न समेत नगर प्रमुख थापाले आग्रह गरे ।

यस्तै शिवराज नगरपालिकाकी उपप्रमुख शिव कुमारी थारुले जनप्रतिनिधि निर्वाचित हुँदै गर्दा हस्तलिखित सरकारी कागजपत्र प्रविधिमैत्री बनाउन एमआइएस लगायत कर्मचारीहरुको अत्यन्तै सराहनिय भूमिका रहेको प्रशांसा गरिन् । आम नागरिकसँग प्रत्यक्ष सरोकार राख्ने शाखा नै घटना दर्ता तथा सामाजिक सुरक्षा भत्ता शाखा नगरकै उच्च रहेको उनले जिकिर गरिन् । यस्तै शिवराज नगरपालिका वडा नम्बर १ का वडा अध्यक्ष खिमबिक्रम केसी, शिवराज नगरपालिकाका एमआइएस अपरेटर दिपक खड्का, बुद्धभुमि नगरपालिका एमआइएस अपरेटर प्रकाश केसी, शिवराज नगरपालिकाकी भावना पौडेल, महाराजगंज नगरपालिका एमआइएस अपरेटर बृजेश कुमार यादव, सुरेश कोहार लगायतले कार्यक्रमलाई सम्बोधन गरेका थिए । जिल्लाका ९० प्रतिशत घटना दर्ता नविकरण भइसकेको एमआइएस अपरेटर तथा फिल्ड सहायक कपिलवस्तु कार्य समितिले जनाएको छ ।