खोज

पाल्पा, ७ साउन ।

पाल्पाको तानसेनमा सामानको मूूल्य भन्दा बढी रकम लिएर उपभोक्तालाई ठगी गर्ने गरेको पाइएको छ । पोखरा, बुटवलबाट आएका विक्रेताले बजार मूल्य भन्दा बढी नै रकम लिएर उपभोक्ता ठग्ने गरेको पाइएको हो ।

‘सम्पूर्ण ग्यास रिसर्च प्रालि’ पोखरा, शाखा कार्यालय बुटवलका कर्मचारीले तानसेनमा आइ खाना पकाउने ग्यास, चुलो सम्बन्धी आवश्यक उपकरणहरु विक्री गर्दा बजार मूल्य भन्दा बढी रकम लिएको भेटिएको छ ।

कम्पनीका कर्मचारीहरुले झोलामा सामान राखेर ग्यास, चुलोमा प्रयोग हुने सेफ्टी गार्ड, रबर पाईप, सेफ्टी क्लिक, चुलो सफा गर्ने ब्रस, आईजी टि रेगुलेटर लगायतका सामानमा ४ हजारदेखि १० हजारसम्म लिने गरेका छन् । जबकी तानसेनका बजारमा यी सामानहरुको मूल्य एक हजार ८ सय देखि २ हजार एक सय सम्म पर्दछ । उनीहरुले सर्भिस चार्ज सहित सदस्य शुल्क पनि लिने गरेको पाइन्छ । विक्रेताहरुले आईजी टि रेगुलेटरको मूूल्य २ हजार ६ सय ५० लिने गरेको भेटिएको छ । जबकी यसको तानसेनमा बजार मूल्य एक हजार ५ सय पर्ने गरेको छ ।

विक्रेताहरुले तानसेनकी रनौन हेमचुरी, शान्ति दर्नाल लगायतका उपभोक्तासँग सेफ्टी गार्ड, रबर पाईप, आईजी टि रेगुलेटर एक÷एक पिस र सेफ्टी क्लिक दुई पिसको चार हजार लिएका छन् । तानसेन २ कै जयती थापासँग सेफ्टी गार्ड, आईजी टि रेगुलेटर, रबर पाईप, दुई÷दुई पिस, सेफ्टी क्लिक ६ पिस र चुलो सफा गर्ने ब्रस एक पिसको १० हजार २ सय ५० लिएका छन् । उपभोक्ताहरुबाट ठगिएको गुनासो आएपछि पाल्पा ग्यास डिलर्स संघले पाल्पा उद्योग वाणिज्य संघ र पाल्पा व्यापार संघको सहकार्यमा ठगी गर्नेहरुलाई प्रहरीको नियन्त्रणमा ल्याइएको छ । ठगी गर्दै हिड्ने ५ जना भए पनि शनिबार तीन जनालाई मात्र प्रहरीले नियन्त्रणमा लिएको छ । तानसेनको बजार मूल्य भन्दा धेरै नै रकम लिएर उनीहरुले उपभोक्ता ठग्ने गरेको ग्यास डिलर्स संघका जिल्ला अध्यक्ष राजेन्द्र बज्राचार्यले बताए । उपभोक्ता ठगी गर्नेहरुमाथि आवश्यक अनुसन्धान गरी कानुनी कारवाहीलाई आन्तरिक राजस्व कार्यालय बुटवल पठाइएको प्रमुख जिल्ला अधिकारी बन्धु प्रसाल बास्तोलाले बताए ।