खोज

गुल्मी (बुटवलटुडे), १० चैत – कृषि ज्ञान केन्द्र गुल्मीको आयोजनमा आर्थिक वर्ष २०८०÷०८१ को योजना तर्जुमाको विषयमा प्रारम्भिक छलफल तथा स्मार्ट कषि गाउँ कार्यक्रम अन्र्तगत समिक्षा कार्यक्रम सम्पन्न भएको छ । सदरमुकाम तम्घास स्थीत जिल्ला समन्वय समितिको सभाहलमा सञ्चालित कार्यक्रममा कृषि ज्ञान केन्द्र गुल्मीका प्रमुख नवराज भण्डारीले कार्यालयबाट भएगरेका कामहरु र आगामी आर्थिक वर्षमा सञ्चालन गरिने कार्यक्रमहरुको बारेमा जानकारी गराएका हुन ।
जिल्ला स्थीत सम्पूर्ण स्थानीय तहका प्रमुख तथा उपप्रमुख एवं राजनीतिक दलहरुको सहभागिता रहेको उक्त कार्यक्रममा जिल्लामा स्मार्ट कृषि गाउँ कार्यक्रमलाई थप प्रभावकारी बनाउँदै लैजानु पर्ने सुझाव दिएका थिए । कार्यक्रममा स्मार्ट कृषि गाउँ कार्यक्रम संचालकहरुले पनि आफुले संचालन गरेका स्मार्टका कामहरुको बारेमा जानकारी गराएका थिए ।
समिक्षा कार्यक्रममा जिल्ला समन्वय समिति गुल्मीका प्रमुख द्रोण बहादुर खत्रीले कार्यालयलाई जवाफदेही बनाउँदै संचालित कार्यक्रमको प्रभावकारी कार्यान्वयनका लागि राजनीतिक दल र जनप्रतिनिधि सहित समिक्षा कार्यक्रमको आयोजना गरिएको बताए ।
कृषि ज्ञान केन्द्रद्वारा मुसिकोट नगरपालिका, धुर्कोट, छत्रकोट, गुल्मीदरबार, रुरुक्षेत्र र चन्द्रकोट गाउँपालिका सहित जिल्लाका छ स्थानमा स्मार्ट कृषि गाउँ कार्यक्रम संचालन गरिएको छ । सोही कार्यक्रमा प्रधानमन्त्री कृषि आधुनिकीकरण परियोजना परियोजना कार्यान्वयन इकाई गुल्मीकी प्रमुख गंगा पोख्रेलले पनि परियोजनाको तर्फवाट जिल्लामा भएगरेका विभिन्न गतिविधिका साथै आगामी दिनमा गरिने कार्य योजनाहरुको बारेमा जानकारी गराएकी थिईन ।