खोज

सल्यान, ०२ जेठ ।
सल्यानमा एक महिनाको एडभान्स तालिम पश्चात दलित समुदायका महिलाहरू सिलाइ कटाइका लागि सक्षम भएका छन् । शुक्रबार जिल्लाको छत्रेश्वरी गाउँपालिका वडा नं. ६ स्थित लान्तीमा तालिम समापन कार्यक्रममा महिलाहरू आफ्नै हातले सिलाएको कपडा लगाएर सहभागी थिए । तालिम सिकेका १२ जना महिलाहरू सबैले आफ्नै हातले सिलाएका एकै रंगका कपडा लगाएका थिए । “सीप सिकौं, आत्मनिर्भर बनौं” भन्ने नारालाई व्यवहारमा उतार्दै दलित समुदायका महिलाहरू महिला तथा पुरुषका कपडा सिलाउन सक्षम भएका हुन् ।

यो तालिमले उनीहरूमा सीप प्रदान गरेको छ भने जीवनमा अब केही गर्न सकिन्छ भन्ने आत्मविश्वास पनि बढाएको छ । तालिम समापन कार्यक्रममा आफैले सिलाएको चिटिक्क कुर्ता सुरुवालमा सजिएकी दिपा विकले मुस्कुराउँदै भनिन्, “पहिला सिलाउने ठाउँ खोज्नुपथ्र्यो, अब आफैँ सिउन सक्ने र अरू महिला पुरुषका लागि पनि सिउन सक्ने भएकी छु ।” स्वरोजगारको सम्भावनासहित आयआर्जनको यात्रा सुरु गर्ने एडभान्स तालिम प्राप्त गरेका महिलाहरूको सोच रहेको छ ।

तालिम समापन कार्यक्रममा प्रशिक्षार्थीहरूलाई प्रमाणपत्र वितरण गर्दै छत्रेश्वरी गाउँपालिकाका अध्यक्ष ओज बहादुर बुढाथोकीले सीपले मानिसलाई अवसर मात्र नभएर आत्मबल पनि प्रदान गर्ने भन्दै अव व्यवसायीक रूपमा अघि बढ्न सुझाव दिए । गाउँपालिका उपाध्यक्ष बुद्ध कुमारी खत्री, वडा नं ६ का वडा अध्यक्ष टिकाराम बुढा, उद्योग तथा उपभोक्ता हित संरक्षण कार्यालय सल्यानका निमित्त कार्यालय प्रमुख जनक खड्का लगाएले बोल्दै सीप सिकेर व्यवसाय गर्नेहरूलाई अनुदान लगाएतका सहयोग गरिने बताए ।

मुख्यमन्त्री दलित आयआर्जन प्रवद्र्धन कार्यक्रम अन्तर्गत संचालन गरिएको यस तालिमको आयोजना उद्योग तथा उपभोक्ता हित संरक्षण कार्यालय सल्यानले गरेको हो । जिल्लाको शारदा नगरपालिकामा पनि १६ जना महिलाहरूले एडभान्स कटाई सिलाई तालिम लिइरहेका थिए । गत वैशाख ४ गतेदेखि सुरु भएको तालिम शुक्रबार समापन गरिएको हो । समापन कार्यक्रममा वडा नं. ६ का वडा सदस्य सागर नेपाली, श्री खड्गनाथ योगी, सामाजिक विकास कार्यालय सल्यानका अधिकृत पहलमान वली, प्रशिक्षक निम कुमारी थापा लगायतको सहभागिता रहेको थियो ।