खोज

काठमाडौं, १ जेठ ।

 कप्तान इन्दु बर्माको आक्रामक ब्याटिङले नेपाललाई आईसीसी महिला टी–२० विश्वकप एसिया छनोटको समूह चरणको अन्तिम खेलमा बहराइनसँग हार हुनबाट जोगाएको छ। वर्षाका कारण छोट्याइएको खेलमा नेपालले ७ ओभरमा ५६ रनको लक्ष्य पाएको थियो, जुन उसले ८ बल अगावै ४ विकेट गुमाएर पूरा गर्‍यो।

नेपालको सुरुआत खराब रह्यो। ३.५ ओभरमै २३ रनको स्कोरमा ४ विकेट गुमाइसकेको अवस्थामा कप्तान इन्दुले आक्रामक पारी खेलेर टोलीलाई संकटबाट उकासिन्। उनले ७ बलमा अविजित २४ रन बनाउँदै पाँचौं ओभरमा लगातार तीन चौका र छैटौं ओभरमा एक चौका तथा एक छक्का प्रहार गरेर नेपाललाई जित दिलाइन्। यसअघि सम्झना खड्का ५, रुबी पोदार १, कविता जोशी ०, र पुजा महतो १३ रनमै आउट भएका थिए।

खेलको पहिलो इनिङमा टस जितेर पहिले ब्याटिङ गरेको बहराइनले १२.४ ओभरमा ३ विकेटको क्षतिमा ७६ रन बनाएको थियो। त्यसपछि आएको वर्षाले खेल केहीबेर अवरुद्ध गर्‍यो र डकवर्थ लुइस (DLS) प्रणालीअनुसार नेपाललाई ७ ओभरमा ५६ रनको संशोधित लक्ष्य दिइयो।

यसअघि पनि बहराइनले नेपाललाई चुनौती दिँदै आएको भए पनि नेपालले दुईवटै खेलमा जित निकाल्न सफल भएको छ। अब समूह चरणको अन्तिम खेलमा शुक्रबार हङकङ र बहराइन भिड्नेछन्। यदि सो खेलमा हङकङ विजयी भयो वा वर्षाका कारण खेल सम्पन्न हुन सकेन भने हङकङ नेट रनरेटका आधारमा सुपर ३ मा पुग्नेछ, र नेपाल प्रतियोगिताबाट बाहिरिनेछ। नेपाललाई अघिल्लो चरणमा पुग्न अब बहराइनले हङकङलाई हराउनु अत्यावश्यक छ।