खोज

नेपालगञ्ज, ९ वैशाख ।

विभागीय टोली नेपाल पुलिस क्लब लुम्बिनी कप अन्तर्राष्ट्रिय आमन्त्रण महिला फुटबल प्रतियोगिताको फाइनलमा प्रवेश गरेको छ । नेपालगन्ज रङ्गशालामा मङ्गलवार सम्पन्न पहिलो सेमिफाइनल खेलमा अर्को विभागीय प्रतिद्वन्द्वी त्रिभुवन आर्मी क्लबलाई सडनडेथमा ६–५ ले निराश बनाउँदै पुलिस फाइनलमा प्रवेश गरेको हो ।

निर्धारित ९० मिनेटको खेलमा पुलिसको तर्फबाट मिना देउवा र आर्मीको तर्फबाट तुलसा बोहराले १÷१ गोल गरेका थिए । खेल अवधिभर पुलिसमाथि निकै दबाब बढाए पनि आर्मीले जित निकाल्न सकेन । निर्धारित समयमा खेल १÷१ को बराबरीमा रोकिएपछि खेल पेनाल्टी सुट आउटमा गएको थियो । पुलिसकी रेविका पाण्डे, उषा नाथ, निरु थापा, सुष्मा तामाङ, अनुष्का शेर्पा र अमृता जैसीले पेनाल्टीमा गोल गरे भने मोनिका पुलामी मगर, मिना देउवा र समीक्षा घिमिरेले गोल गर्न चुके । यस्तै आर्मीकी तुलसा बोहरा, हिमा चौधरी, सपना लामा, बिमला विक र सुखरिया सुक्लखुले गोल गर्न सफल भए भने अंचली वाइबा, चन्द्रा भण्डारी, सुनिता चौधरी र इन्दिरा राईले गोल गर्न सकेनन् ।

खेलमा प्लेर अफ द म्याच पुलिसकी गोलकिपर उषा नाथ भइन् । पुलिसले अब उपाधिका लागि बुधबार हुने रौतहट फुटबल संघको टोली र अर्को विभागीय टोली एपीएफबीचको खेलको विजेतासँग प्रतिस्पर्धा गर्नेछ । प्रतियोगितामा नेपाल र भारतका गरेर ८ वटा टिमको सहभागिता रहेकोमा घरेलु टिम बाँके–११, कर्णाली एफसी, सुदूरपश्चिम एफसी र सिलिगुडी फुटबल क्लब पहिलो चरणको खेलबाट बाहिरिएका छन् । बाँके जिल्ला फुटबल संघसँगको सहकार्यमा संचालित प्रतियोगिताको विजेता टिमले ५ लाख ५ हजार ५ सय ५५ रुपैयाँ र उपविजेता टिमले २ लाख ५० हजार रुपैयाँ, ट्रफी, मेडल र पुरस्कार प्राप्त गर्ने आयोजक अन्तरालले जनाएको छ । प्रतियोगिता वैशाख १२ गतेसम्म चल्नेछ ।