खोज

बुटवल, २४ चैत ।
बुटवलमा जारी यू–१४ टि ट्वान्टी क्रिकेट प्रतियोगिताको तेस्रो दिनको खेलमा स्टार क्रिकेट एकेडेमी लगातार तीन खेलमा विजयी भएको छ । यसैगरि विश्व स्कुलले पहिलो जित निकालेको छ । वेस्टर्न क्रिकेट क्लब बुटवलको आयोजना तथा बुटवल उपमहानगरपालिकाको आर्थिक सहयोगमा शनिबार भएको पहिलो खेलमा स्टारले वेष्ट्रन क्रिकेट क्लबलाई १० बिकेट तथा दोस्रो खेलमा विश्व स्कुलले रुपन्देही क्रिकेट एकेडेमीलाई ७ बिकेटले पराजित गरेको हो ।

नरैनापुर क्रिकेट मैदानमा भएको पहिलो खेलमा वेष्ट्रनले टस जितेर ब्याटिङ रोजेर १४.३ ओभरमा सबै बिकेटको नोक्सानीमा केवल ४२ रनको लक्ष्य खडा गरेको थियो । वेष्ट्रनका बिराट नेपालीले ४१ बलमा १३ रनबाहेक अन्य कुनै खेलाडीले दोहोरो अंकको रन जोड्न सकेनन । कम स्कोरमा रोक्न स्टारका अब्राहम अली र आरुष अधिकारीले समान ४–४ बिकेट लिए । झिनो लक्ष्य पछ्याएको स्टारले बिना विकेट गुमाएर ३.३ ओभरमा लक्ष्य भेटायो । स्टारका ओपनर अब्राहम अलिले १३ बलमा ३१ तथा आरुष अधिकारीले ८ बलमा ७ रनको नटआउट पारी खेले । खेलमा स्टारका अब्राहम अलि प्लेयर अफ म्याच घोषित भए ।

यसैगरि दोस्रो खेलमा टस जितेर रुपन्देही क्रिकेट एकेडेमीले ब्याटिङ रोज्दै निर्धारित २० ओभरमा ९ बिकेटको नोक्सानीमा ८१ रनको लक्ष्य खडा गरेको थियो । रुपन्देहीका सत्यम हरिजनले नटआउट १६ रन, भानुभक्त पाण्डेयले १५ रन तथा ओपनर सामो एमडी खानले ११ रनको योगदान दिए । कम स्कोरमा रोक्न विश्व स्कुलका एन्जी पाठकले २ बिकेट लिए । झिनो लक्ष्य पछ्याएको विश्व स्कुलका ब्याट्सम्यान १४.१ ओभरमा केवल ३ बिकेटको नोक्सानीमा लक्ष्य भेटायो । विश्वका ओपनर ब्याट्सम्यान ओजस पराजुली २० बलमा १० रन बनाउदै क्याच आउट भए । अर्को ओपनर एन्जी पाठक १० बलमा बिना खाता खोलेर क्याच आउट भईन । तेस्रो र चौथो नम्बरका ब्याट्म्यानहरु सुशान्त सुवेदी र नबिन पाण्डेयले खेललाई सम्हाले । सुवेदीले २२ बलमा ११ तथा पाण्डेयले २३ बलमा १८ रनको योगदान दिदै टिमलाई पहिलो जित दिलाए । खेलमा विश्वका एन्जी पाठक प्लेयर अफ दी म्याचबाट पुरस्कृत भए ।

प्रतियोगितामा १२ वटा टिम दुई समुह विभाजन गरी राउण्ड रोविनका आधारमा खेलाएर समूहको शिर्ष दुई टोलीले उपाधिका लागि प्रतिस्पर्धा गर्ने क्लबका अध्यक्ष भुवन पाण्डेले बताए । प्रतियोगितामा विजेता टिमले नगद ४१ हजार ट्रफी, मेडल र प्रमाणपत्र तथा उपविजेता टिमले २१ हजार नगद राशी प्राप्त गर्ने उनले बताए । यसैगरी विधागत तर्फ उत्कृष्ट व्याट्सम्यानलाई २ हजार ५ सय, सर्वोत्कृष्ट खेलाडीलाई ५ हजार नगद राशीले सम्मान गरिने उनले बताए ।