खोज

राजावादीहरूको शुक्रबारको प्रदर्शन हिंसात्मक वनाउने उद्देश्यले गरिएको सुनियोजित घटना थियो भन्ने घटनाक्रमहरूले पुष्टि गरेको छ । घटनामा परी एक पत्रकारसहित दुईजनाको मृत्यु भएको छ । शान्तिपूर्ण प्रदर्शनका नाममा सुरक्षा घेरा तोड्ने, सुरक्षाकर्मीमाथि आक्रमण गर्ने, हतियार खोस्ने, सर्वसाधारण नागरिकका घर, व्यावसायिक भवन, सञ्चार गृह, राजनीतिक दलका कार्यालय र सरकारी भवनमाथि आगजनी, लुटपाट गर्नु लोकतन्त्रमाथिकै प्रहार हो । शासन व्यवस्थाप्रति धज्जी उडाउनु हो । मुलुकको लोकतान्त्रिक प्रणालीलाई बिथोलेर अराजकतातिर धकेल्ने आपराधिक क्रियाकलाप निन्दनीय छ । राजावादीहरूले गरेको प्रदर्शनलाई कुनैपनि अवस्थामा विरोधको शैली भन्न सुहाउँदैन् । प्रदर्शन हिंसात्मक र अराजक तबरले गरिएकोमा सर्वत्र आलोचना भएको छ । राजावादीले शुक्रबार जुन कृयाकलाप गरे त्यो हिंसात्मक र अराजकताको पराकाष्ठा हो । यो घटनाको जति नै भत्र्सना गरेपनि कम हुन्छ । अराजक भीडले राजनीतिक दलका पार्टी कार्यालय, व्यक्तिका निजी सम्पत्ति, सञ्चार गृह लगायत सार्वजनिक सम्पत्तिमाथि तोडफोड गर्न अक्षम्य अपराध हो । यो घटनाले गणतन्त्रवादी र राजावादीको चरित्र जनताले बुझ्ने गरी प्रदर्शन भएको छ । राजाबादी प्रदर्शन अराजकताको पराकाष्ठा हो । यो घटनाले राजाबादीहरू देशमा अस्थीरता फैलियोस भन्ने चाहेको देखिन्छ । तर, अव नेपाली जनता निरंकुशता नामको कुनैपनि दासता स्वीकार्न सक्दैनन् भन्ने कुरा विगतका धेरै घटनाले प्रमाणित गरेको छ । इतिहास साक्षी छ– राजतन्त्रले देशको स्थायित्व, विकास र भलो गरेको कुनैपनि प्रमाणित आधार छैन । पृथ्वीनारायण शाह र महेन्द्रलाई देखाएर राजा फर्किने कल्पनै नगरे हुन्छ । हो पृथ्वीनारायण शाह र राजा महेन्द्रले देशको लागि ठूलो काम गरेको कुरामा दुईमत छैन् । उनीहरूले देशका लागि गरेको योगदानको स्मरण देशले गरिरहेको छ । तर, विगतको योगदानको भरमा देशलाई बंश परम्परामा धकेल्ने चेष्टा गर्न सकिदैन् । कहिल्यै भुल्न सकिदैन– अव इतिहासको रथ फेरि पछाडि जान सक्दैन । कसैले फेरि वंशको शासन ल्याउने कुचेष्टा गर्नु आजको युगमा दिवास्वपना मात्रै हो ।

शुक्रबारको राजाबादीहरूले गरेको हिंसाजन्य घटनाको विभिन्न सामाजिक संघ संस्थाले निन्दा र भत्र्सना गरेका छन । इन्सेकले आगजनी, तोडफोड र लुटपाटका घटनाले लोकतान्त्रिक मूल्य–मान्यता र व्यक्तिको जिउधनको सुरक्षाको आधारभूत अधिकारको हनन् भएको भन्दै भत्र्सना गरेको छ । आन्दोलनका नाममा गरिएको आगजनीमा पत्रकारको मृत्यु भएको छ । यहीक्रममा एकजना प्रदर्शनकारीको समेत मृत्यु भएको छ । प्रदर्शनका नाममा राजनीतिक दल तथा आमसञ्चार माध्यमका कार्यालयहरूमा गरिएको आक्रमणलाई लोकतान्त्रिक अभ्यास मान्न सकिँदैन् । यस प्रकारको हिंसात्मक घटनाले कुनैपनि अवस्थामा राजतन्त्र फर्कन सक्दैन । बरु अहिलेसम्म बचेखुचेको राजतन्त्रप्रतिको साख समेत खरानी हुने अवस्था आएको छ । व्यवस्था फाल्न त्यतिकै सजिलो छैन । राजतन्त्र फालेर गणतन्त्र ल्याउन सयौं नेपालीले सहादत दिएका छन् । यद्यपि नेताहरूले जनआकांक्षा अनुसार काम गर्न नसके व्यवस्थामाथि चुनौती थपिन सक्नेतर्फ भने अव सचेत हुनैपर्दछ । आजको परिवर्तित विश्व परिवेशमा वंश राजनीति कसैले स्वीकार्न सक्दैनन् । प्रतिगमनकारी राजावादी शक्ति फेरि उठ्न सम्भव छैन । प्रतिगामी शक्तिहरू जुर्मुराउनुमा शासकहरूको पनि कमजोरी भएको स्वयं नेताहरूले नै स्वीकार गरेका छन् । सत्ता बनाउने र सत्ताकै खेलमा लाग्दा जनतामा आक्रोश बढेको छ । यो आक्रोशलाई पपुलिस्टहरू, अराजकवादीहरूले प्रयोग गर्ने प्रयत्न गरेका छन् । तर, विरोधको नाममा समय वा व्यवस्थालाई पछाडि फर्काउने हर्कत कुनैपनि मानेमा स्वीकार हुन सक्दैन् । नेकपा (एमाले) ले सबै राजनीतिक दल पश्चगमनका दुष्प्रयासका विरुद्ध गोलबन्द हुन आह्वान गरेको छ । उसले उदण्डता, अराजकता र हिंसाको घोर भत्र्सना गरेको छ । अव आपराधिक क्रियाकलापमा संलग्नलाई तत्काल कानुनी दायरामा ल्याउन र शान्ति सुरक्षाको प्रभावकारी प्रबन्ध गर्नेतर्फ सरकारको ध्यान जाओस् ।