खोज

बुटवल, २० फागुन ।
दृष्टिविहीन क्रिकेट संघ लुम्बिनीको आयोजनामा ४ दिने दृष्टिविहीन क्रिकेट पुनर्ताजगी तालिम तथा प्रतियोगिता सम्पन्न भएको छ । बुटवल उपमहानगरपालिका वडा नम्बर १२ मा रहेको जवई क्रिकेट मैदानमा आयोजना गरिएको तालिममा ४ दिनसम्म दृष्टिविहीन भएका व्यक्तिहरूले क्रिकेट खेल्दा पालना गर्नुपर्ने नियमहरू, बलिङ्ग, फिल्डिङ्ग, क्याचिङ्ग लगायतका आधारभूत सीपहरू, रन बनाउने, बाउन्ड्री बाउन्ससम्मका सीपहरूको बारेमा तालिम प्रदान गरिएको संघका कोषाध्यक्ष गणेश सापकोटाले जानकारी दिए । गत फागुन १६ गतेबाट सुरुवात भएको तालिमको १९ गतेसम्म चलेको थियो ।
प्रशिक्षण तथा प्रतियोगीतात्मक तालिममा २५ जना दृष्टिविहीन खेलाडीहरूको सहभागिता रहेको थियो । तालिममा नेपाल दृष्टिविहीन क्रिकेट संघका केन्द्रीय उपाध्यक्ष तथा अन्तर्राष्ट्रिय क्रिकेट खेलाडी गिता पौडेल, अन्तर्राष्ट्रिय दृष्टिविहीन क्रिकेट खेलाडी सुनिल क्षेत्रीले तालिम प्रदान गरेका थिए । कार्यक्रममा दृष्टिविहीन क्रिकेट संघका कार्यसमिति सदस्य सिता दर्नाल, अब्दुल जहिद फिकीर लगायतको सहभागिता रहेको थियो । प्रतियोगिता समेत आयोजना गरिएको तालिममा सिकेका कुरालाई प्रतियोगीतात्मक रूपमा प्रस्तुत गरिएको थियो ।

‘ए समूह’ र ‘बी समूह’ गरी दुई भागमा विभाजन गरी आयोजना गरिएको प्रतियोगीतामा टिम ‘ए’ समूह विजयी भएको छ । तालिम तथा प्रतियोगितामा पहिला टस जितेर ब्याटिङ्ग गरेको समूह ‘बी’ ले सबै विकेट गुमाउँदै १ सय ३६ रन बनाएको थियो । जवाफी ब्याटिङ्गमा उत्रिएको ‘टिम ए’ ले निर्धारत ओभरमा १ सय ४२ रन बनाउन सफल भयो । ६ रनले टिम ए विजयी भएको संघका कोषाध्यक्ष गणेश सापकोटाले जानकारी दिए । प्रतियोगीतामा बेष्ट प्लेयर केशव भाट क्षेत्री घोषित भए । प्रतियोगीतामा सहभागी खेलाडीहरूलाई मेडल समेत प्रदान गरिएको थियो ।