खोज

बुटवल, १४ फागुन ।
कपिलबस्तुमा शुरुभएको दोस्रो कपिलवस्तु तिलौराकोट खुला नकआउट राष्ट्रिय फुटबल प्रतियोगितामा संकटा एफसीले विजयी भएको छ । कपिलवस्तु जिल्ला फुटबल संघको आयोजनामा बुद्ध रंगशालामा बुधबार भएको उद्घाटन खेलमा आयोजक कपिलबस्तु – ११ लाई १–० गोल अन्तरले स्तब्ध पार्दै संकटा अन्तिम चारमा स्थान बनाएको हो ।

निक्कै प्रतिस्प्रर्धात्मक खेलको पहिलो हाफ बराबरी भयो । दोस्रो हाफको ईन्जरी समयमा उत्तम शाहीले एकमात्र गोल निर्णायक बन्यो । उनि खेलमा प्लेयर अफ दी म्याच घोषित हुदै नगद १० हजार रुपैयाँसहित ट्रफीबाट पुरस्कृत भए । बिहीबार दिउँसो ३ बजे मछिन्द्र एफसी र हिमालयन शेर्पाबीच दोस्रो खेल हुने जिल्ला फुटवल संघ अध्यक्ष तिलक थापाले बताए । फागुन १४ देखि २१ गतेसम्म सञ्चालन हुने प्रतियोगितामा कपिलवस्तु–११, संकटा एफसी, मछिन्द्र क्लब काठमाडौं र हिमालयन शेर्पा, नेपाल पुलिस, थ्री स्टार क्लब, बीएफसी चितवन र जोन्जी एफसी सिक्किम भारत गरि ८ वटा टोलीको सहभागिता रहेको छ ।

गोल्डकपको उपाधि विजेताले नगद ११ लाख ११ हजार १ सय ११ रुपैया, कप, मेडल, प्रमाणपत्र र उपविजेता हुने टिमले ५ लाख ५५ हजार ५ सय ५५ नगद पुरस्कार पाउने जिल्ला फुटबल संघ कोषाध्यक्ष गणेशबहादुर सिंह ठकुरीले बताए । विभिन्न विधागत रुपका उत्कृष्ट खेलाडीलाई ३०/३० हजार तथा गोल्डकपकै सर्वोत्कृष्ट खेलाडीलाई ५० हजार प्रदान गरिने बताए ।

खेल पर्यटनमै सम्भावना छ –मुख्यमन्त्री आचार्य

लुम्बिनी प्रदेशका मुख्यमन्त्री चेतनारायण आचार्यले खेल पर्यटनबाट आर्थिक समृद्धिको सम्भावना रहेको बताएका छन । दोस्रो कपिलवस्तु तिलौराकोट खुला नकआउट राष्ट्रिय फुटबल प्रतियोगिताको उद्घाटन गर्दै मुख्यमन्त्री आचार्यले खेलकुदको माध्यमबाट आन्तरिक तथा बाह्य पर्यटक आकर्षित गर्न सकिने आधार तयार भएको बताए ।

मुख्यमन्त्री आचार्यले खेलकुद प्रतिस्पर्धा, अनुशासन र पारदर्शिता सिक्ने माध्यम भएकाले यसलाई जीवन पद्धतिसँग जोड्न सकिने उल्लेख गरे । उनले प्रदेश तथा स्थानीय सरकारको सहकार्यमा खेल पूर्वाधारको विकास गर्न सकिने बताउँदै कपिलवस्तुमा रंगशाला निर्माणका लागि सरकारले साझेदारी गर्ने प्रतिबद्धता व्यक्त गरे । ‘खेल पूर्वाधार विकास, खेलाडीको क्षमता अभिवृद्धि तथा नयाँ खेलाडी उत्पादनका लागि नियमित प्रतियोगिताहरू आयोजना गर्न प्रदेश सरकारले प्राथमिकताका साथ काम गरिरहेको छ ।’–मुख्यमन्त्री आचार्यले भने । कपिलवस्तुमा रंगशाला निर्माणका लागि स्थानीय सरकारका प्रमुखसँग छलफल भएको समेत उनले बताए । आगामी वर्षको सम्पूरक बजेटमार्फत यसलाई सम्बोधन गर्न सरकारले आवश्यक पहल गर्ने बताए ।

लुम्बिनी प्रदेशलाई राष्ट्रिय तथा अन्तर्राष्ट्रिय स्तरमा चिनाउन खेलकुदले महत्वपूर्ण भूमिका खेलेको उल्लेख गर्दै मुख्यमन्त्री आचार्यले कपिलवस्तु जिल्ला फुटबल संघलाई धन्यवाद ज्ञापन गरे ।

कार्यक्रममा प्रदेशसभा सदस्य विष्णु पन्थी, बाणगंगा नगरपालिकाका प्रमुख चक्रपाणी अर्यालले खेल पर्यटनका सम्भावनालाई बढाउने गरि खेल गतिविधि प्रदेशमा भैरहेको बताए ।