खोज

बुटवल, २३ माघ ।
गुल्मी जिल्लाको एक सामुदायिक विद्यालयमा विद्यालयमा नै उपस्थिति नभएका शिक्षकको नाममा तलब भत्ता बुझेको भन्दै अख्तियारमा मुद्दा दर्ता भएको छ । गुल्मी जिल्लाको कालिगण्डकी गाउँपालिका वडा नम्बर १ मा रहेको देउराली माध्यमिक विद्यालयका शिक्षक छनौटको कुनै कानूनी प्रक्रिया पूरा गरिएको थिएन । बेपत्ता रहेको भनिएको व्यक्तिको शैक्षिक प्रमाणपत्र दुरूपयोग गरी नियुक्ति दिने कार्य गरेको, निजको नाममा नक्कली कागजात बनाई नियुक्ति पत्र, हाजिरी भएको पत्र, हाजिरी विवरण बनाई हाजिरी प्रमाणितगरी तलब भत्ता एकमुष्ट लिइएको पाइएको हो ।
नक्कली कागजपत्र बनाएर कालिगण्डकी गाउँपालिका गुल्मीमा पेश गरी गैरकानूनी रूपमा विद्यालयमा अनुपस्थित शिक्षकको नाममा पारिश्रमिक रकम निकासा गराई बार्षिक एकमुष्ठ तलब बुझेको झुट्टा फर्जी लिखत तथा भरपाई तयार गरिएको थियो । यसरी गैरकानुनी फर्जि कार्य गरेको जानकारी पाएपछि अख्तियार मुद्दा दायर गरेको छ । अख्तियार द्धारा जारी विज्ञप्तीमा उक्त कार्य गर्दा लेखापरीक्षणसमेत समेत नक्कली रूपमा गरेको अरोप समेत लागाइएको छ ।
अख्तियार अनुसन्धान दुरूपयोगका प्रवक्ता नरहरी घिमिरेका अनुसार उक्त विद्यालयमा माध्यमिक तह (कक्षा ९–१०) को अङ्ग्रेजी, गणित वा विज्ञान विषयको शिक्षण सिकाई अनुदान कार्यक्रम अन्तर्गतको रिक्त शिक्षक पदमा नक्कली शिक्षक खडा गरी उसैको नाममा फर्जि कागजपत्र बनाएर एक मुष्ट तलव बुझेको उल्लेख छ ।

यद्यपी यो घटना आर्थिक बर्ष ७८/७९ को हो । घटना भएको ३ बर्ष पछि अख्तियारले मुद्धा दायर गरेको छ । अख्तियारले दायर गरेको मुद्धामा तत्कालिन व्यवस्थापन समितिका अध्यक्ष नगेन्द्र प्रसाद सापकोटासँग ८ लाख ८७ हजार ८ सय ८० रूपैयाँ विगो रकम समेत माग गरिएको छ । भ्रष्टाचार निवारण ऐन, २०५९ को दफा ८ को उपदफा (१) को (ङ) र दफा ९ बमोजिमको कसुरमा सोही ऐनको दफा ८ को उपदफा (१) बमोजिम कैद र बिगो वमोजिम जरिवाना सजाय हुन र सोही ऐनको दफा ९ बमोजिम कैद र जरिवानासमेत सजाय हुन मागदावी लिइएको प्रवक्ता घिमिरेले जानकारी दिए ।
यस्तै तत्कालिन विद्यालयका प्रधानाध्यापक तथा विद्यालय व्यवस्थापन समितिका सदस्य सचिव समेत रहेका मित्रलाल पाण्डे, विद्यालयक लेखा सहायक कर्मचारी प्रेम नारायण पाण्डे, विद्यालय व्यवस्थापन समितिका तत्कालीन सदस्यहरू वेदबहादुर राना मगर, लक्ष्मी भण्डारी न्यौपाने, पदमपानी पाण्डे, सरस्वती पाण्डे, ईश्वरा दर्लामी र बलबहादुर न्यौपाने विरुद्ध मुद्धा दायर गरिएको हो । सबै बाट विगो रकम ८ लाख ८७ हजार ८ सय ८० रूपैयाँ विगो रकम समेत माग गरिएको छ ।

यता, कालिगण्डकी गाउँपालिका शिक्षा शाखा प्रमुख अग्निधर पराजुलीका अनुसार यो घटना आर्थिक बर्ष ७८/७९ को हो । सोही विद्यालयका निमावि राहत मा अध्यापन गराउँदै आएका शिक्षक अन्यत्र गएपनि उक्त शिक्षकको डकुमेन्ट(कागजपत्र) प्रयोग गरेर विद्यालयले पेश गरेको कागज पत्रको आधारमा संघीय अनुदानमा पालिकाबाट भुक्तानी भएको शिक्षा शाखा प्रमुख पराजुली बताउँछन् ।कार्यविधि अनुसार बार्षिक एकमुष्ट रकम भुक्तानी गर्ने अनुसार रकम पालिकाबाट भुक्तानी भएको उनको भनाई छ । बुटवल टुडे संगको कुराकानीमा उनले भने–‘कोरोना कालमा थियो, उहाँहरूले ल्याएको डकुमेन्टको आधारमा पालिकाले भुक्तानी दिएको थियो, तर पछि छानविन गर्दै जाँदा फर्जि रहेछ, हामी पहिला पनि सचेत गराउने, आगामी दिनमा गल्त नगर्ने गरी सचेत समेत गराएका थियौं ।’

यो घटना सार्वजनिक भएपपछि पालिकाले उक्त रकम विद्यालयबाट फिर्ता समेत गराईसकेको शिक्षा प्रमुख पराजुलीको भनाइ छ । यो विषयमा पालिकाले सबै रकम फिर्ता गराएर पालिकाको खातामा जम्मा गरेको भैचर समेत अख्तियारमा पठाएको शिक्षा प्रमुख पराजुलीको भनाइ छ । तर अख्तियारले आफ्नो नियमित कार्य अनुसार अहिले आएर मुद्दा दायर भएको सूचना प्राप्त भएको जानकारी आफूले पाएको बताए ।देउराली माध्यामिक विद्यालयका तत्कालीन प्रधानाध्यापक तथा विद्यालय व्यवस्थापन समितिका तत्कालीन सदस्य सचिव मित्रलाल पाण्डे अहिले सेवा निवृत्त भैसकेका छन् । कालिगण्डकी गाउँपालिका वडा नम्बर १ का अध्यक्ष लालुप्रसाद पाण्डेका अनुसार वि.स. २०७७/७८ को बेला संघीय अनुदानबाट एक जना शिक्षकको नाममा तलव लिने र स्थानीय रूपमा २, ३ जना शिक्षक विद्यालय स्रोत बाट राखेर त्यहीँबाट तलव खुवाउने गरी काम भएको भन्ने जानकारी आफुले पाएको जानकारी दिए । आफु त्यो समयमा जनप्रतिनीधी नभएको र आफू बाहिर भएको कारण पनि यो विषयमा थप जानकारी आफूसँग नभएको वडा अध्यक्ष पाण्डेको भनाई छ । वडा अध्यक्ष पाण्डेयले बुटवल टुडे संगको कुराकानीमा यो विषयमा घटना सार्वजनिक भएपछि आफू जननिर्वाचित प्रतिनिधिको रूपमा वडामा आएपछि ७९ सालतिर विद्यालयबाट रक्त रकम अशुल उपर गरी पालिकाको खातामा जम्मा गराएको समेत जानकारी दिए । उनले भने–‘यो विषयमा घटना सर्वाजनिक भएपछि हामी जनप्रतिनिधी भएर आएपछि तलब भत्ता बापत गएको रकम सबै फिर्ता गराएर जम्मा गरेका हौं, अहिले मुद्दा दायर भएको रहेछ ।’