खोज

काठमाडौं।

अधिकारकर्मी दयाराम परियारको स्मृतिमा राष्ट्रिय मानव अधिकार आयोगद्वारा स्थापित ‘दयाराम परियार स्मृति मानव अधिकार पुरस्कार’ वरिष्ठ अधिवक्ता कृष्णप्रसाद भण्डारीलाई प्रदान गरिएको छ। भण्डारीलाई मानव अधिकार, कानुनी शासन र सामाजिक न्यायमा पुर्याएको योगदानको कदर गर्दै उक्त पुरस्कार दिइएको आयोगले जनाएको छ।

७६औं अन्तर्राष्ट्रिय मानव अधिकार दिवसको अवसरमा मंगलवार आयोजित एक समारोहमा उपप्रधानमन्त्री विष्णु पौडेलले वरिष्ठ अधिवक्ता भण्डारीलाई पुरस्कार प्रदान गरे। कार्यक्रममा राष्ट्रिय मानव अधिकार आयोगका अध्यक्ष तपबहादुर मगरले पनि भण्डारीलाई सम्मानित गरेका थिए।

दयाराम परियार, जो मानव अधिकारका क्षेत्रमा सक्रिय थिए, ०६२ सालको चैत महिनामा शाहीकालमा प्रहरीको गोली लागेर शहादत प्राप्त गरेका थिए। उनको सम्मानमा हरेक वर्ष ‘दयाराम परियार स्मृति मानव अधिकार पुरस्कार’ प्रदान गरिँदै आएको हो।

अहिलेसम्म मानव अधिकार र सामाजिक न्यायको क्षेत्रमा योगदान गरेका धेरै व्यक्तिहरूलाई यो पुरस्कार प्राप्त भइसकेको छ, जसमा डा. शिवमाया तुम्बाहाम्फे, श्याम सुन्दर शशी, दुर्गा घिमिरे, चन्द्रकिशोर झा, बलदेव राम, चरिमाया तामाङ, शारदा चन्द, टेकनाथ बराल लगायतका प्रतिष्ठित नामहरू छन्।