खोज

चन्द्रौटा(कपिलवस्तु), २६ मंसिर ।

शिवराज नगरपालिकाकी उपमेयर शिवकुमारी थारुले लैंगिक हिंसाको अन्त्यका लागि समुदायको सक्रिय भूमिका र सचेतना आवश्यक रहेको बताएकी छन् । महिला तथा बालबालिकाको हक र अधिकार सुनिश्चित गर्न सबै क्षेत्रबाट सहकार्य हुनु पर्ने बताईने लैंगिक हिंसाविरुद्धको अभियान नियन्त्रण गर्नेको दायित्व केवल महिलाको मात्र नभएर सबै समुदाय, सबै वर्गको रहेको उनको भनाइ छ ।

कपिलवस्तुको शिवराज नगरपालिकामा लैङ्गिक हिंसा विरुद्धको १६ दिने अभियान समापन कार्यक्रमलाई सम्बोधन गर्दै उनले यस्तो बताएकी हुन् । नोभेम्बर २५ देखि डिसेम्बर १० तारिख (मंगलबार) सम्म सञ्ंचालित अभियान सार्थक पार्नु आवश्यक रहेको बताउँदै हिंसामुक्त समाज निर्माणका लागि सबै क्षेत्रबाट सशक्त पहल गर्ने उपमेयर थारुले जिकिर गरिन् । शिवराज नगरपालिकाले आगामी दिनमा हामी अझ प्रभावकारी कदम चाल्दै नागरीकको सुरक्षाका लागि प्रतिबद्ध रहेको बताईन ।

यसैबीच शिवराज नगरपालिका वडा नम्बर ५ का वडा अध्यक्ष नेत्र प्रसाद बेल्बासेले हिंसाको उन्मूलनका लागि सामाजिक र सांस्कृतिक सोंच परिवर्तन गर्नुपर्नेमा जोड दिए । राष्ट्रिय मानव अधिकार प्रतिष्ठान कपिलवस्तुका निवर्तमान सभापति विष्णु प्रसाद खतिवडाले मानव अधिकार संरक्षण र प्रवर्द्धनमा सबै तहका सरकारको भूमिकामा सुधार आवश्यक रहेको बताए ।

अभियानलाई प्रभावकारी बनाउन सिद्धार्थ सामाजिक विकास केन्द्रले नगरसँग सहकार्य गरेर शिवराजका ८ वडामा लैंगिक हिंसाका घटनाहरूलाई न्यूनीकरण गर्न विभिन्न कार्यक्रम संस्थागतरुपमा अभियान संचालन गरेको केन्द्रका कार्यक्रम संयोजक अजय चौधरीले बताए । कार्यम्रममा व्यापार संघ कपिलवस्तुका महासचिव गोपनल बन्जाडे, चन्द्रौटा उद्योग वाणिज्य संघका वरिष्ठ उपाध्यक्ष पारशमणि पाण्डे , शान्ति पुनस्थापना गृह कपिलवस्तुका भुमिराज भट्टराई र महिला मानव अधिकारकर्मी मिना परियारले लगायतले कार्यक्रमलाई सम्बोधन गरेका थिए । अभियानलाई सार्थक बनाउन सक्रिय संस्थाहरुले सचेतनामूलक विभिन्न कार्यक्रम गर्दै आएपनि हिंसा भने न्यूनीकरण हुन सकेको छैन् ।