खोज

बुटवल, १३ मंसिर ।
रूपन्देही उद्योग संघले स्थापना दिवस तथा उद्योग दिवसको अवसरमा ३ दिन विविध कार्यक्रम गर्ने भएको छ । वि.सं.२०३५ साल मङ्सिर १५ गते स्थापना भएको उद्योग संघ ४७ वर्षको पुगेको छ । संघले आफ्नो ४७ औं स्थापना दिवसमा विभिन्न कार्यक्रम गरी तीन दिन मनाउन लागेको पत्रकार सम्मेलन आयोजना गरी जानकारी गराइएको हो । संघका अध्यक्ष दिलिप सापकोटाले स्थापना दिवसमा ३ दिन भिन्दाभिन्दै कार्यक्रम गरिने जानकारी दिए । तीन दिने कार्यक्रम अन्तर्गत १३ गते संघकै सदस्यहरूलाई क्रियाशील बनाएर सहभागिता गराउने गरी अन्तर सदस्य उद्योगी ब्याडमिन्टन प्रतियोगिता बुटवल ७ शिवनगरस्थित न्यू लुम्बिनी ब्याडमिन्टन क्लबको कभर्ड हलमा गरिने छ ।

१४ गते बिहान संघको सचिवालयमा रक्तदान र १५ गते बिहान मूल समारोहको आयोजना गरिँदै छ । मूल समारोहमा प्रमुख अतिथि नेपाल सरकारका उपप्रधान तथा अर्थमन्त्री विष्णुप्रसाद पौडेल, लुम्बिनी प्रदेशका उद्योग यातायात तथा पर्यटन मन्त्री प्रचण्ड विक्रम न्यौपाने, सिएनआईका अध्यक्ष अध्यक्ष राजेश कुमार अग्रवाल लगायतको सहभागिता हुने अध्यक्ष सापकोटाले जानकारी दिए ।

मुल समारोहमा अग्रज उद्यमी तथा विभिन्न क्षेत्रका उत्कृष्ट उद्योगीहरूको सम्मान, नेपाल पत्रकार महासंघ रूपन्देहीको समन्वयमा संघले स्थापना गरेको उत्कृष्ट औद्योगिक पत्रकारिता पुरस्कार प्रदान, छात्रवृत्ति वितरणका साथै उद्योग डाइरेक्टरी २०८१ विमोचन गरिने छ ।

२०५७ सालमा स्थापना गरेको उत्कृष्ट औद्योगिक पत्रकारिता पुरस्कार निरन्तर वितरण गर्न सुरुवात गरेको संघले मंसीर १५ गते ४७ औं स्थापना दिवसको अवसर पारेर ४७,१५५।— राशीको उत्कृष्ट औद्योगिक पत्राकरिता पुरस्कार वितरण गर्न लागेको हो ।
अलग–अलग संयोजनको जिम्मेवारी तोकिएको छ । अन्तर सदस्य उद्योगी ब्याडमिन्टन प्रतियोगिताका लागि खेल संयोजक बलबहादुर गोदार (बाल्दार), उद्योगी सम्मान तथा पत्रकारिता पुरस्कार छनौट समितिमा निवर्तमान अध्यक्ष माधवप्रसाद पौडेल, रक्तदान कार्यक्रमको संयोजकमा कार्यसमिति सदस्य राजु घिमिरेलाई जिम्मेवारी तोकिएको छ ।

संघले काठमाडौं बाहिर प्रथम पटक वि.सं. २०४५ सालमा राष्ट्रिय औद्योगिक प्रदर्शनीको आयोजना गरेको थियो । त्यसपछि १५ औं पटक औद्योगिक प्रदर्शनी सफलतापूर्वक सम्पन्न भएको संघका पुर्व अध्यक्ष तेज कुमार पाठकाले पत्रकार सम्मेलनका जानकारी गराएका थिए । उद्योगी बाँचेमा सबै बाँचने भन्दै उनले यसको लागि सबैले सहकारी गर्नुपर्ने बताएका थिए ।
संघले २०६२ सालमा परिकल्पना गरेको मुटु अस्पताल स्थापनाको अभियान स्वरूप बुटवलमा २०७० साल पौष १० गतेदेखि संघको संरक्षकत्वमा गौतम बुद्ध सामुदायिक मुटु अस्पताल संचालनमा छ । मुटु अस्पताल काठमाडौं बाहिर मुटु रोगको उपचारको केन्द्रका रूपमा स्थापित हुँदै गएको छ ।
अस्पतालले बुटवल, दाङ, पाल्पा, स्याङ्गजा र कपिलवस्तुमा मृगौलाको डायलासिस सेन्टर स्थापना गरी सेवा विस्तार गरेको छ भने निकट भविष्यमै नवलपरासीमा समेत सेवा सुचारु हुँदैछ । नेपाल पत्रकार महासंघ रूपन्देहीका अध्यक्ष रामराज पोखरेलले उद्योगी व्यवसायीहरूको समस्या समाधानको लागि उनीहरूले गरेका हरेक क्रियाकलपामा पत्रकारहरूले साकारात्मकम भूमिका निर्वाह गरेको बताएका थिए ।