खोज

नवलपुर, ३ मंसिर ।

गैँडाकोटको नारायणी नदी किनारमा सञ्चालनमा आएको ‘अन्डर वाटर फिस टनेल’ मा दर्शकको आकर्षण बढ्दै गएको छ । टनेल सञ्चालनमा आएको तीन दिनमै १० हजार बढी दर्शकहरुले अवलोकन गरेका सञ्चालकहरु बताउँछन् ।

टनेलभित्रको पानीमा राखिएको माछा हेर्ने दर्शकहरुको भीड दैनिकरुपमा बढ्दो क्रममा छ । नवलपुरको गैँडाकोट–५ की सुशीला कुमारी गुरुङले आफूले जीवनमै पहिलोपटक पानी भरिएको टनेलभित्र गएर माछा हेर्न पाएको बताइन् । टनेलभित्र पसेर विभिन्न प्रकारका सानादेखि ठूलासम्म माछाहरु हेर्न पाउँदा आफ्ना बालबालिकाहरुसमेत खुसी भएका उनले बताइन् ।

दुई सय फिट लम्बाइ तथा ६० फिट चौडाइमा निर्माण गरिएको डोमभित्र पानीले भरिएको टनेलमा माछा राखेर टनेलभित्रबाट हेर्ने व्यवस्था गरिएको छ । टनेलभित्रको माछा हेर्नका लागि गैँडाकोट–२ गैरीबाट पुगेका रमेश न्यौपानेले विदेशमा गएर समुद्रभित्र सिसामा पसेर माछा हेर्न पाइन्छ भन्ने आफूले सुनेको भए पनि अहिले प्रत्यक्ष देख्न पाएको बताए । आकर्षक र नौलो अनुभव पाएको उनको भनाइ छ ।

गैँडाकोटमा ‘अन्डर वाटर फिस टनेल’ राख्ने संस्था राजधानी एम्युजमेन्ट राइट्स नेपालका प्रतिनिधि कृष्ण शर्मा पौडेलले टनेल सञ्चालनमा आएपछि दिनप्रतिदिन दर्शकहरुको उपस्थिति बढ्दै गएको बताए । विदेश गएर टनेलभित्रको माछा हेर्न धेरै खर्च लाग्ने भएकाले ‘अन्डर वाटर फिस टनेल’ हेर्ने नेपालीहरुको इच्छा पूरा गर्ने गर्री आफूहरुले काम गरेको बताए ।

टनेलभित्र पानीमा राखिएको माछा वातानुकुलित वातावरण (एसी)मा बसेर हेर्न पाउने व्यवस्था गरिएको पौडेलको भनाइ छ । दोस्रो संस्करणको गण्डकी प्रदेश महोत्सव परिसरमा निर्माण गरिएको टनेलभित्र पानीमा राखिएका माछा ६ फिटसम्म लम्बाइका छन् भने ती माछाहरु चीन एवम् अन्य विदेशी मुलुकबाट ल्याइएका हुन् ।

पूर्वी नवलपरासीको गैडाकोटमा जारी दोस्रो गण्डकी प्रदेश महोत्सवमा स्थानीय परिकार र उत्पादनसंगै ‘अन्डर वाटर फिस टनेल’ सुरुङ्ग मा दर्शकको आकर्षण बढेको हो ।

टनेल सञ्चालनमा आएको चार दिनमै १० हजार बढी दर्शकहरुले अवलोकन गरेको आयोजकले बताएको छ । अन्याधुनिक प्रविधिमार्फत कृत्रिम सुरुङ्ग निर्माण गरेर माछा राखिएको छ । गण्डकी प्रदेश स्तरीय महोत्सव कात्तिक २६ गते देखि मंसिर १० गते सम्म संचालन हुने उद्योग बाणिज्य महासंघ गण्डकी प्रदेशका अध्यक्ष अमृत भट्टचनले बताए ।