खोज

प्यूठान, ३० कार्तिक ।
सरकारको हुलाक सेवालाई पुनःसंरचना गरी ‘एक पालिका, एक हुलाक कार्यालय’ को अवधारणा प्यूठानमा कार्यान्वयन हुँदै गएको छ । ऐरावती गाउँपालिकामा बिहीबार पालिका हुलाकको स्थापना गरिएको छ । जिल्ला हुलाक प्यूठान अन्तर्गत ऐरावती गाउँपालिकाको बरौलामा पालिका हुलाक कार्यालयको स्थापना गरिएको हो ।

सरकारले हरेक पालिकामा हुलाक कार्यालय स्थापना गरी सेवा सञ्चालन गर्ने नीतिबमोजिम कार्यालय सञ्चालनमा ल्याइएको जिल्ला हुलाक कार्यालय प्यूठानका प्रमुख लाल बहादुर वलीले जानकारी दिए । उनले हुलाकलाई सूचना प्रविधिसँग जोड्दै सङ्घीय शासन प्रणालीअनुसार सेवा सुरु गरिएको बताए । कार्यालय स्थापनाले हुलाकको सेवालाई सहज बनाउन मद्दत पुग्ने र सरकारी नीति कार्यान्वयन हुने विश्वास लिइएको छ ।

जिल्लाका ९ स्थानीय तह मध्ये मल्लरानी गाउँपालिकामा जिल्ला हुलाक रहेकोले बाकी ८ स्थानिय तहमा पालिका हुलाक स्थापना गर्ने योजना रहेको छ । उनका अनुसार बिहीबारसम्म जिल्लाका ५ वटा पालिकामा पालिका हुलाक कार्यालयको सञ्चालन गरिएको छ । ऐरावती सहित स्वर्गद्घारी नगरपालिका, माण्डवी गाउँपालिका, झिमरुक गाउँपालिका र गौमुखी गाउँपालिकामा लगातार पालिका हुलाक सञ्चालनमा आइसकेका छन् । बाँकी पालिकामा एक साताभित्रमा पालिका हुलाकका कार्यालय सञ्चालनमा ल्याइने योजना रहेको कार्यालयले जनाएको छ ।