खोज

बुटवल, २८ कात्तिक ।

सहकारी बचत अपचलनको अभियोगमा प्रहरी अनुसन्धानमा रहेका राष्ट्रिय स्वतन्त्र पार्टी (रास्वपा)का सभापति तथा पूर्व गृहमन्त्री रवि लामिछानेसँग बुधबार रुपन्देहीमा नौ घण्टा बयान लिइएको छ ।

जिल्ला सरकारी वकिल कार्यालयमा मंगलबार र बुधबार दुई दिन लगाएर बयान लिइए पनि अझै नसकिएको जिल्ला न्यायाधिवक्ता प्रेमराज पौडेलले बताए ।

जिल्ला सरकारी वकिलको कार्यालय रुपन्देहीमा बुधबारदोस्रो दिन बिहान सवा १० बजे लगिएकोमा साँझ साढे ७ बजे बयान सकिएको हो । बुधबार लिखित बयान भएकाले केही विषय लिपिवद्ध गरेर बाहिर निकालिएको हो ।

जिल्ला प्रहरी कार्यालय रुपन्देहीका प्रवक्ता डिएसपी लक्ष्मी खनालका अनुसार लामिछानेसँगको बयान नसकिएकाले बिहीबार पुनः बयान लिइने छ । मंगलबार पत्रकारसँग बोलेपछि बुधबार कडा सुरक्षा निगरानीमा राखेर लामिछानेलाई बाहिर निकालिएको थियो । पत्रकारलाई पनि लामिछानेको फोटो भिडियो खिच्न दिइएन । उनलाई निकाल्ने समयमा रास्वपाका समर्थकहरुले नाराबाजी गरेका थिए । उनलाई जिल्ला प्रहरी कार्यालयमै राखिएको छ ।

सूर्यदर्शन सहकारी ठगी प्रकरणमा अनुसन्धानका लागि कास्की जिल्ला प्रहरी कार्यालयको हिरासतमा राखिएका पूर्वगृहमन्त्री लामिछानेलाई मंगलबार दिउँसो रुपन्देही ल्याइएको थियो ।

मंगलबार दिउँसो १ बजेदेखि ५ बजेसम्म बयान लिइएको थियो । स्रोतका अनुसार, रविले केही ठाउँमा बाझिने प्रकारका अभिव्यक्ति दिएका छन् । सुरूमा थाहा छैन भनेका कुरा पछि गएर अन्य सवालमा केही तथ्यहरू खुलाएको बताइएको छ ।

खासगरी लामिछानेका नाममा दुई करोड रूपियाँ सुप्रिम सहकारीबाट निकासा भएको यसअघि नै अदालतमा दायर अभियोगपत्रमा उल्लेख गरिएको थियो । तर, त्यतिबेला रविलाई प्रतिवादी बनाइएको थिएन ।

रविले उक्त रकम आफूले आवेदन दिएर नलिएको बताए पनि आफू सम्बद्ध खातामा कसरी जम्मा भयो भन्ने विषयमा केही विरोधाभासपूर्ण अभिव्यक्ति दिएको बताइएको छ । साथै जुन ठेगाना उल्लेख गरिएको छ, त्यो रवि लामिछाने को हो त भन्ने विषयमा पनि उनले फरकफरक कुरा बताएका छन् ।

सुप्रिम सहकारीबाट सवा १४ करोड रूपैयाँ गोर्खा मिडियामा गएको छ । त्यसबाहेक रविको नाममा मात्र थप दुई करोड रूपियाँ अनियमित तरिकाले निकासा गरिएको प्रहरी अनुसन्धानबाट देखिएको छ ।