खोज

बुटवल, २९ असोज । बुटवलमा विशिष्टिकृत सेवा दिदै आएको बुटवल हस्पिटल प्रा.लि.यस क्षेत्रकै नीजि लगानीको सुविधासम्पन्न अस्पताल भएको पुर्व मन्त्री तथा नेपाली कांग्रेसका नेता बालकृष्ण खांणले बताएका छन । मंगलबार अस्पतालको पुर्वमन्त्री खांण सहितका नेताहरुले अस्पतालको नवनिर्मित भवन, उपकरण तथा सेवाका बारेमा जानकारी लिदै सो कुरा बताए । बुटवलमा नीजि क्षेत्रको एक सय शैयाको आफ्नै भवनमा बनेको बुटवल हस्पिटल प्रा.लि पहिलो अस्पताल हो ।

अस्पतालको अवलोकन प्रश्चात पुर्वमन्त्री खांणले बुटवल धेरै हिसाबले अब्बल रहेपनि स्वास्थ्य क्षेत्रमा पछाडी परेको भान भएको बेला बुटवल हस्पिटल प्रा.लि.सुविधासम्पन्न विशिष्टिकृत सेवा दिन सफल भएको बताए । संविधानले परिकल्पना गरे अनुसार स्वास्थ्यको हक नागरिकहरुको मौलिक अधिकार भएपनि सबैको पहुचमा सरकार पुग्न नसकेको भन्दै पुर्व मन्त्री खांणले नीजि क्षेत्रबाट नागरिकलाई सेवा दिन सफद भएको बताए ।

बुटवल हस्पिटल प्रा.लि.ले दुखी गरिव आसहाय विरामीहरुको उपचारमा पनि मद्त गर्ने विश्वास व्यक्त गर्दै उनले यो हस्पिटल यस क्षेत्रकै गहना भएकोले सबैको सकारात्मक सहयोग आवश्यक रहेको बताए । अस्पतालका अध्यक्ष चुन्न प्रसाद पौडेलले नीजि क्षेत्रबाट भएको प्रयासलाई तीन तहका सरकार र नागरिकहरुले सकारात्मक ढंगले सहयोग गरे आफुहरुको हौसला बढ्ने बताए । उनले बुटवलबाट उपचारकै लागि भारतिय शहरहरुमा गएर विरामीले धेरै दुखकष्ट पाउनुका साथै ठुलो धनराशी खर्च भैरहेको वेला आफ्नै स्थानमा वनेको अस्पतालको संरक्षणमा सबैको साथ पाउने अपेक्षा गरे । उनले छिट्टै नर्सिंङसहितका कार्यक्रमहरु पनि अघि बढाउने बताउदै राज्यले तोकेको मापदण्ड अनुसार स्वास्थ्य क्षेत्रलाई अघि बढाउनु पर्ने बताए ।

अस्पतालको अवलोकनका क्रममा गण्डकी प्रदेशका अर्थ मन्त्री डा टुक बहादुर गुरुङ, नेपाली कांग्रेस लुम्बिनी प्रदेशक ससदिय दलका प्रमुख सचेतक जमुना ढकाल, बुटवल उपमहानगरपालिकाका मेयर खेलराज पाण्डे, बुटवल वडा न ४ का वडा अध्यक्ष नरिश्वर शर्मा पौडेल, बुटवल वडा न ६ का वडा अध्यक्ष लोकनाथ न्यौपाने, नेपाली कांग्रेसका नगर उपसभापती ज्योती भण्डारी, बुटवल उद्योग बाणिज्य संघका महासचिव मुक्ति अधिकारी, बुटवल हस्पिटल प्रा.लि.का सचिव मोहन पाण्डे, अस्पतालका निर्देशक डा कृष्ण खनाल लगायतकाले अस्पतालका विषयमा धारणा राखेका थिए । आजभन्दा २४ वर्ष अघि स्थापना भएको यो अस्पतालमा विभिन्न विधाका ३५ जना कन्सल्टेण्ट डाक्टरहरु सहित २ सय ५० जना कर्मचारीहरु रहेका छन् ।