खोज

चन्द्रौटा(कपिलवस्तु), १९ असोज ।

कपिलवस्तुको पर्यटकीय क्षेत्र राजापानीमा पहिलो पटक साहसिक खेल “पोन्ड क्रस विथ रोप” को आयोजना हुने भएको छ । लायन्स क्लब कपिलवस्तुको आयोजनामा असोज २३ गतेदेखि सुरु हुने यस प्रतियोगितामा सहभागीहरूले डोरीको माध्यमबाट पोखरी पार गर्नेछन् । प्रतियोगिताको औपचारिक घोषणा बुधबार पत्रकार सम्मेलनमार्फत सार्वजनिक गरिएको हो ।

खेल दुई उमेर समूहमा विभाजन गरिएको छ—बालबालिकाको लागि (८ देखि १६ वर्ष उमेर समूह) र वयस्कहरूको लागि। कार्यक्रम संयोजक राम सुभागे थारुका अनुसार यो प्रतियोगिता कपिलवस्तुमा पहिलो पटक आयोजना गरिएको हो । खेलबाट संकलित रकम लागू पदार्थ दुव्र्यसन र अटिजमबाट प्रभावित व्यक्तिहरूको सहयोगार्थ खर्च गरिने क्लबका अध्यक्ष नवदत्त घिमिरेले जनाए । संयोजक थारुले खेलका नियमहरू पनि स्पष्ट पारेका छन् । उनका अनुसार प्रतियोगितामा सहभागीहरूले ५० मिटरको दुरीमा झुन्ड्याइएको रस्सीको रिङको सहायताले पोखरी पार गर्नुपर्ने बताए । बालबालिकाका लागि दूरी २५ मिटर तोकिएको छ भने वयस्कहरूले ४८ मिटरको दूरी पार गर्नुपर्ने उनको भनाइ छ ।

सबैभन्दा छिटो समयमा दूरी पार गर्ने खेलाडीलाई विजेता घोषणा गरिनेछ । क्लबका अध्यक्ष घिमिरेले पुरस्कारको व्यवस्था पनि निकै आकर्षक रहेको बताएका छन् । उनका अनुसार जुनियरतर्फ प्रथम स्थान हासिल गर्नेलाई ११ हजार, दोस्रोलाई ७ हजार र तेस्रोलाई ५ हजार नगद पुरस्कार प्रदान गरिनेछ । सिनियरतर्फ प्रथम स्थानलाई ५१ हजार १११, दोस्रो स्थानलाई २५ हजार १११, र तेस्रो स्थानलाई १५ हजार १११ नगद पुरस्कार प्रदान गरिनेछ । “यो प्रतियोगिताले कपिलवस्तुको साहसिक पर्यटनको प्रवर्द्धन मात्र होइन, नेपाललाई अन्तर्राष्ट्रिय स्तरमा समेत चिनाउने छ,” घिमिरेल बताए । उनले प्रतियोगिताले स्थानीय तथा अन्तर्राष्ट्रिय पर्यटकहरूलाई आकर्षित गर्ने विश्वाससमेत व्यक्त गरे ।

यस खेलले जिल्लाको पर्यटन क्षेत्रको विकासमा नयाँ आयाम थप्ने अपेक्षा गरिएको छ । प्रतियोगिता सफल गर्नका स्थानीय संघसंस्थाको सहयोग रहने दावी छ । “साहसिक खेलप्रेमीहरूका लागि प्रतियोगिता निकै रोमाञ्चक हुनेछ” ः थारुले भने । “पोन्ड क्रस विथ रोप“ प्रतियोगिताले कपिलवस्तुको राजापानीलाई साहसिक खेलको गन्तव्यको रूपमा स्थापित गर्ने लक्ष्य राखेको क्लबले जनाएको छ ।