खोज

बुटवल, १४ भदौ ।
कपिलवस्तु जिल्लाको मायादेवी गाउँपालिकाको काम ३ दिन सम्म डेढ सय गाईले छेकेका छन् । पालिकामा रहेका छाडा चौपायले किसानको बाली खाएर हैरान बनाएपछि किसानले पालिका कार्यालयमा रहेर गोठ नै बनाएर छाडा चौपाय बाँधीदिएपछि ३ दिनदेखि पालिकाको काम ठप्प भएको हो ।

पालिकाका स्थानीय किसानले १ सय २० भन्दा बढि छाडा चौपाय, गाई, गोरु, साढे लगेर पालिकामा परिषरलाई गोठ बनाएर बाँधेका छन् । गत बर्ष छाडा चौपायाको व्यवस्थापन गरेपनि यो बर्ष भने पालिकाले छाडा चौपाय व्यवस्थापनमा ठोस चाँसो नदेखाएको कारण किसानले छाडा चौपाय जम्मा पारेर पालिकाको भवनमा खाँबो गाडेर गोठ नै बनाएर राखेका थिए ।

छाडा चौपायाले अन्नबालि बालि खाएर नष्ट गरेको भन्दै मायादेवी गाउँपालिकाका स्थानियवासीले तीन दिनदेखि छाडा चौपाया गाई,गोरु गाउँपालिका कार्यालय परिषर भित्र थुनिदिएका थिए । पालिकामा रहेको सवारी साधन पाकिङ्ग गर्ने टहरो र पालिकाको परिषरमा छाडा चौपाय धुनिदिँदा पालिका प्रवेशमा नै अवरोध भएको छ ।

पालिका परिषरको यो अवस्था देखेपछि जनप्रतिनिधी र कर्मचारी गाई गोरु हेर्दै फर्किने गरेका छन् । पालिकामा ३ दिन देखि किसानले गाई–गोरु बाँधेपछि पालिकाको काम पूर्णरूपमा ठप्प भएको एक अधिकृतले जानकारी दिए । उनले भने–‘३ दिन देखि गाई–गोरुले बाटो छेकेपछि कार्यालय जाने काम गर्ने वातावरण नै भएन, काम भएन । ’

पालिकाको यो लापरवाहीका कारण सेवा लिन पुगेका सेवाग्राहीले सास्ति भोगिरहेका छन् । यो अवरोधका कारण विहीवार कार्यपालिका बैठक वडा न १ को वडा कार्यालयमा बसेको एक कर्मचारीले जानकारी दिए ।
गत बर्ष पालिकाले ठेक्का (टेण्डर) आह्वान गरी व्यवस्थापन गरेको थियो । यो बर्ष भने पालिकाले छाडा चौपाय व्यवस्थापनको लागि ठोस काम अगाडी बढाएको थिए ।

पालिकाका योजना शाखा अधिकृत रामकृष्ण तेलीका अनुसार पहिलो पटक ठेक्का आह्वानका लागि आह्वान गरेपनि कोही पनि सम्झौताका लागि आएका थिएनन् ।दोस्रो पटक पनि ठेक्का नपरेपछि तेस्रो पटक सूचना प्रकाशन गरिएको थियो । योजना अधिकृत तेलीका अनुसार तेस्रो पटक सूचना प्रकाशन गरेपछि विहिबार सम्झौता भएको छ ।उनले भने–‘शुक्रबार विहान छाडा चौपाय हटाउने सहमती भएको छ , अव व्यवस्थापन हुन्छ । ’

व्यवस्थापनको लागि यो बर्ष प्रतिछाडा चौपाय मासिक १५ सय रूपैयाँमा सम्झौतामा गरिएको छ । गत बर्ष १२ सय रूपैयाँ दिने गरी व्यवस्थापन गरिएको थियो । पालिकाले ट्याग लगाएर संकलन गरिएका चौपाय व्यवस्थापन गर्ने छन् । पशु शाखाको अनुगमन गरी दिएको अनुगमन रिर्पोट र ट्यागका आधारमा प्रति महिना भुक्तानी दिने गरी सम्झौता गरिएको पालिकाका योजना अधिकृत तेलीले जानकारी दिए ।