खोज

बुटवल, ४ भदौ ।

अदालतबाट सजाय तोकिएका एकजना प्रदेशसभा सदस्य लुम्बिनी प्रदेशसभाको मंगलबारको बैठकमा उपस्थित भएका छन् । मुख्यमन्त्री चेतनारायण आचार्यले विश्वासको मत लिइरहेको प्रदेशसभाको बैठकमा काँग्रेसबाट निर्वाचित फरार सांसद धनबहादुर केसी (डिबी बैठकमा उपस्थित भएका हुन् ।

दुई वा दुईभन्दा बढी दलको समर्थनमा नियुक्त मुख्यमन्त्रीले ३० दिनभित्र प्रदेश सभाबाट विश्वासको मत लिनुपर्ने संवैधानिक व्यवस्था अनुसार आचार्यले अहिले बिश्वासको मत लिइरहेका छन् । अहिले प्रदेशसभामा एमालेका २९ र कांग्रेसका २७ सांसद छन् ।

८७ सदस्यीय प्रदेशसभामा विश्वासको मतका लागि ४४ सांसदको समर्थन आवश्यक पर्छ । एमाले र कांग्रेसको बहुमत पुग्ने भए पनि साना दलले पनि विश्वासको मत दिने भएका छन् । जस अनुसार सत्ता साझेदार कांग्रेस र एमालेले मुख्यमन्त्री आचार्यलाई विश्वासको मत दिन अनिवार्य उपस्थित हुन ह्वीप जारी गरिसकेका छन् ।

तर, विश्वासको मत दिन रुकुम पूर्वका कांग्रेसका फरार सांसद केसी प्रदेश सभा बैठकमा सहभागी भएका हुन् । यस बिषयलाई विपक्षी दल माओवादी केन्द्रले चासोका साथ हेरेको छ । सम्बन्ध विच्छेदको नक्कली कागज बनाएपछि उनकै श्रीमती राधा केसीको जाहेरीमा (वादी नेपाल सरकार) सुनुवाइ गर्दै अदालतले केसीलाई दोषी ठहर गरेको हो ।

२०४८ साल असार ९ गते अदालतले एक वर्ष जेल र दुई हजार जरिवानाको फैसला सुनाए पनि केसीले हालसम्म सजाय भुक्तान गरेका छैनन् । उनी नेपाली काँग्रेसका तर्फबाट उम्मेदवार बनेर उनी रुकुम पूर्वको प्रदेश (ख) बाट सांसद निर्वाचित भए । ‘अदालतबाट दोषी प्रमाणित भएका व्यक्ति सदनमा छन, ‘जेलमा बस्नुपर्ने मान्छे सदनमा बस्नु कानुनी राज्यको उपहास भएका प्रतिपक्षको आरोप छ ।