खोज

बुटवल, २ भदौ । नगरभित्रका क्लबहरुलाई मापदण्ड तयार गरेर समेट्ने तयारी गरेको बुटवल उपमहानगरपालिकाका नगरप्रमुख खेलराज पाण्डेयले बताएका छन । सामाजिक कार्य गर्ने पवित्र उदेश्य बोकेका क्लबहरुलाई उपमहानगरपालिका हातोमालो गर्ने गरि अघि बढाउन लागेको उनले बताए । युवाहरुको नेतृत्व रहेको बुटवलकै सबैभन्दा पुरानो रोट्क्याट क्लब अफ बुटवलको २७ औ स्थापना दिवस कार्यक्रमको उद्घाटन गर्दै उनले युवाहरुलाई क्षमता विकाससंगै सामाजिक कार्यमा लाग्न क्लबहरु प्लेटफर्मका रुपमा रहेको दाबी गरे । बुटवलमा धेरै क्लबहरु मध्ये यो क्लबको छुट्टै पहिचान बनाउन सफल भएको भन्दै क्लबको गरिमालाई उचो राख्ने गरि नया नेतृत्व लाग्न सुझाव दिए । ‘यहाँ रहेका १७० वटा क्लबहरुलाई समेटेर क्लबको मापदण्ड बनाउदैछौ ।’—उनले भने ।

पालिकाको अभिन्न अंगको रुपमा जोडेर सरसफाइ, वृक्षारोपण लगायतको अभियानलाई जोडेर लैजान लागेको उनले बताए । सबै क्लब र क्लबका सदस्यहरु पालिकासंग जोडेर स्वस्थ्य, शिक्षा, हरियाली, उज्यालो, सरसफाई लगायत क्षेत्रमा कार्यविभाजन गरेर अघि बढ्न सकिने समभावना रहेको बताए । बुटवल केवल सम्पन्नताको शहर नभई कतिपय न्युन आय भएका पनि रहेको भन्दै सक्नेले नसक्नेलाई केही गर्ने गरि अघि बढ्न सुझाव दिए । युवा स्वदेशमा भएन भन्ने रदान गर्नभन्दा विदेशमा गर्ने मेहनत यहाँ गर्न सके देश बन्नेमा दुईमत नरहेको उनले दाबी गरे । विदेश जादा पनि सीप लिएर जान उनले आग्रह गर्दै पालिकाबाट धेरै सीप मुलक कार्यक्रमलाई जोड दिदै आएको उनले बताए । अहिले बजारमा पन्चेबाजा बनाउने, कृषि औजार निर्माण गर्नेको माग रहेको भन्दै यस विषयमा तालिममा जोड दिने बताए । क्लबबाट भएका सामाजिक कार्यको सामाजिक अडिट जरुरी रहेको उनले बताए ।

कार्यक्रममा पुर्वअध्यक्ष रोशन पाण्डेयले वर्ष २०२४/२०२५ का अध्यक्ष दिपेश कुमार अग्रहरीको बायोग्राफी पढेर सुनाए । वर्ष २०२३÷२०२४ का अध्यक्ष अर्जुन खनालले वर्ष २०२४/२०२५ का अध्यक्ष दिपेश कुमार अग्रहरीलाई पद हस्तान्तरण गरे । रोटरी डिष्ट्रिक ३२९२ का डिष्ट्रिक ट्रेजरर माधव प्रसाद पराजुलीले पद तथा गोपनियताको शपथ खुवाएका थिए । क्लबका संस्थापक अध्यक्ष बोनिन पियाले अध्यक्ष अग्रहरीलाई चार्टर सर्टिफिकेट हस्तान्तरण गरेका थिए ।

कार्यक्रममा वर्ष २०२४/२०२५ का अध्यक्ष दिपेश कुमार अग्रहरीले आफ्नो वार्षिक कार्ययोजना सार्वजनिक गर्दै युवाहरुलाई आयश्रोतमा जोड्ने गरि कार्यक्रम, महिला सदस्यहरु बढाउने, थिम कनेक्ट एण्ड एक्सपोज अनुसार मेरो पकेट फस्ट डस्टबिन जस्ता धेरैभन्दा धेरै कार्यक्रमहरु गर्ने प्रतिवद्घता जनाए ।

कार्यक्रममा क्लबका संस्थापक अध्यक्ष बोनिन पियाले परिवारपछि समाज र समुदायमा चिनिने र नेतृत्व विकास गर्ने उपयुक्त माध्यम रोट्याक्ट भएको बताए । रोट्याक्टमा आवद्घ हुदा नया साथीहरुको सर्कल प्राप्त हुने, नेतृत्व विकास हुने, फेलोसिपको माध्यमबाट ब्यक्ति र संस्थागत विकास गर्न मद्दत मिल्ने उनले दाबी गरे । रोट्याक्टको पहिलो सचिवालय बुटवलमा निर्माण भएको भन्दै यो भवनलाई थप स्तरवृद्घि गर्न जरुरी रहेको उनले बताए । आम्दा अस्पतालमा रहेको रोट्याक्ट गार्डेनलाई समेत थप ब्यवस्थित गर्न उनले सुझाव दिए ।

कार्यक्रममा रोटरी क्लब अफ बुटवलका अध्यक्ष प्रज्वल थान्जु, क्लबका प्रेसिडेन्ट ईलेक्ट कृष्ण अधिकारी, सचिव दिब्या रेग्मीले सामुहिक भावनाका साथ क्लब लाग्नुपर्ने बताए ।