खोज

सुर्खेत, १ भदौ ।

कर्णाली प्रदेशका मुख्यमन्त्री यमलाल कँडेलले दशौं राष्ट्रिय खेलकुद प्रतियोगिता आयोजनाले कर्णाली प्रदेशको मूल्यांकन हुने बताएका छन् । शनिबार वीरेन्द्रनगरमा आयोजित दशौं राष्ट्रिय खेलकुद प्रतियोगिताका लागि सरोकारवालासँग छलफल तथा परामर्श कार्यक्रममा मुख्यमन्त्री कँडेलले प्रतियोगिता आयोजना हुने कुराले देश तथा विदेशबाट मूल्यांकन हुने बताए ।

उनले प्रतियोगिताको विषय कर्णालीप्रतिको भरोसा र विश्वास भएको औल्याएका छन् । निर्धारित समय अनुसार आगामी मंसिर २ देखि ९ गतेसम्म प्रतियोगिता आयोजना हुने र त्यसबेला सम्म अहिलेको अवस्था अनुसार व्यवस्थापन कमजोर रहेको स्पष्ट पारे ।

प्राप्त बजेटबाट दक्षता देखाउन खेलकुद परिषदलाई निर्देशन दिए । प्रतियोगिताका लागि गर्नुपर्ने कामहरू सरकारका तर्फबाट सरकारका प्रतिनिधिले गरिरहेको समेत जानकारी गराए ।

आर्थिक मामिला तथा योजनामन्त्री राजीवविक्रम शाहले दशौं राष्ट्रिय खेलकुद प्रतियोगितालाई सफल पार्न भूमिका अनुसारको दायित्व पूरा गर्नुपर्ने बताए । आर्थिक मामिला तथा योजना मन्त्रालयका तर्फबाट गर्नुपर्ने बजेट लगायतका व्यवस्थापनमा कमी हुन नदिने प्रतिबद्धता समेत जनाए ।

सामाजिक विकास मन्त्री घनश्याम भण्डारीले निर्धारित प्रतिस्पर्धी खेलहरु मध्ये थप खेलहरु समावेश गर्नका लागि आफ्ना तर्फबाट गर्नुपर्ने कामहरू आन्तरिक रूपमा बढाइरहेको बताए । भण्डारीले राष्ट्रिय खेलकुद प्रतियोगिता आयोजना गर्नु र कर्णालीले दुई अंकको पदक लिनु पर्ने चुनौती देखिएको बताए । यसका लागि आवश्यक हुने बजेट, खेलाडीलाई दिनुपर्ने बन्द प्रशिक्षण सहितका आवश्यक व्यवस्थापनका लागि तयारी भैरहेको बताए ।