खोज

सुर्खेत, २८ साउन ।

दशौँ राष्ट्रिय खेलकुद प्रतियोगिता नजिकिदै गर्दा प्रदेश गौरवको आयोजना अन्तर्गत वीरेन्द्रनगरमा निर्माणाधीन रंगशालाको काम धमाधम अगाडि बढेको छ । आगामी असोज महिनासम्ममा सम्पन्न हुने गरी काम अघि बढाइएको प्रदेश खेलकुद परिषद्का सदस्य सचिव विश्वामित्र सञ्ज्यालले जानकारी दिए । ‘पूर्वनिर्धारित समयमै प्रतियोगिता हुने गरी अघि बढेका छौ’ उनले भने, ‘यदि बिचमा कुनै विपद् तथा बाधा नपरेमा समयमै कार्यक्रम हुन्छ ।’

आगामी मंसिरमा आयोजना हुने दशौँ राष्ट्रिय खेलकुद प्रतियोगिता लक्षित गरेर रंगशाला निर्माणको कामलाई अघि बढाइएको सञ्ज्यालले बताए ।

एमएसी–जीएसएल कम्पनीले एक अर्ब ५९ करोड ४७ लाख ४७ हजार ६ सय रूपैयाँमा निर्माणको जिम्मेवारी पाएको हो । २०८१ जेठ ११ गतेभित्र निर्माण सम्पन्न गरिसक्ने गरी सम्झौता भएपनि काम सम्पन्न नभएकाले चार महिना म्याद थप गरेर काम अघि बढाइएको परिषद्ले जनाएको छ । २०७८ कात्तिक २८ गते प्रदेश रंगशाला निर्माणको ठेक्का सम्झौता गरिएको थियो । म्याद थप भएसँगै निर्माणको कामहरु अगाडि बढेको परिषद्का सदस्य सचिव सञ्ज्यालले बताए । २०८१ असोज १० गतेसम्म रंगशाला निर्माणको म्याद थप गरिएको छ । सञ्ज्यालका अनुसार हालसम्म ९० प्रतिशत भौतिक प्रगति हासिल भएको छ भने ९० प्रतिशत नै वित्तिय प्रगति हासिल भएको छ । अब रंगशाला निर्माणको दश प्रतिशत मात्र काम बाँकी रहेको छ ।

पहिलो चरणमा डिजाइन, फिल्ड निर्माणलगायत काम भएका थिए । ती काम ६ महिनाको अवधिमै सकिएको थियो । दश हजार दर्शक अट्ने क्षमताको बनाउने गरी काम भइरहेको रंगशालाको फिनिसिङलगायतका काम अन्तिम चरणमा पुगेको उनले बताए । उनका अनुसार अब मेसिनरी काम मात्रै बाँकी छन् । छाना छाउने, दुबो रोप्ने, हरियाली बनाउने लगायतका काम बाँकी छन् ।

अहिले झ्याल ढोका, बाथरुम फिटिङ लगायतका काम धमाधम भइरहेका छन् । अहिलेसम्म एक अर्ब ४३ करोड बजेट कार्यान्वयन भएको छ । दश हजार दर्शक क्षमताको प्याराफिट स्टेडियमको काम, स्वीमिङ पुल, छाना लगाउने काम भइरहेका छन् भने अन्य काम करिब सकिएको जनाइएको छ । वरिपरि बाटो, कम्पाउन्डिङका सटर, गेट निर्माणलगायतका काम अन्तिम चरणमा रहेको सञ्ज्याल बताउँछन् । आउटडोर मोडमा बास्केट बल, भलिबललगायतका खेल खेल्ने संरचनाका काम सकिएका छन् भने फुटबल मैदानको काम पनि सकिएको छ ।

बजेट अपुग

दशौँ राष्ट्रिय खेलकुद प्रतियोगिताको आन्तरिक तयारीका लागि बजेट अपुग हुने देखिएको छ । प्रदेश सरकारले पर्याप्त बजेट विनियोजन नगर्दा तयारीका लागि बजेट अपुग हुने भएको हो ।

चालु आर्थिक वर्षका लागि माग गरिएको भन्दा कम बजेट विनियोजन गरेपछि यसले रकम अपुग हुने देखिएको छ । उक्त बजेटले जिल्ला–जिल्लामा पूर्व तयारीका खेल खेलाउन बजेट अपुग हुने परिषद्का सदस्य सचिव विश्वामित्र सञ्ज्यालले जानकारी दिए ।

१६ करोड बजेट माग गरिएको भएपनि प्रदेश सरकारले दुई करोड ५६ लाख मात्र बजेट विनियोजन गरेको छ । ‘आन्तरिक तयारीका लागि यो बजेट न्यून छ, यस बजेटले पूर्वतयारीका खेल खेलाउन, अन्य काम गर्न समस्या हुन्छ’ परिषद्का सदस्य सचिव सञ्ज्यालले भने, ‘नवनियुक्त सामाजिक विकास मन्त्रीले यसका लागि बजेट व्यवस्था गरिदिने बताउनुभएको छ, बजेटको व्यवस्था भएमा तयारी रामा्रेसँग गर्न सकिन्छ ।’

यस्तै, संघीय सरकारले दशाँै राष्ट्रिय प्रतियोगिता आयोजनाका लागि यो वर्ष ६० करोड बजेट विनियोजन गरेको छ । संघीय सरकारले प्रतियोगिता आयोजनाका लागि बजेट छुट्टयाएको हो । तर गृहप्रदेशमा हुने प्रतियोगिताका लागि आवश्यक तयारी गर्न भने बजेट कम भएको हो ।