खोज

बुटवल, २३ साउन । आन्तरिक तथा बाह्य पर्यटकहरुको आर्कषकको केन्द्रका रुपमा रहेको बुटवलको हिलपार्कलाई दीर्घकालिन योजनासहित प्राकृतिक सौन्दयीकरणलाई जोड दिनुपर्ने एक कार्यक्रममा बोल्ने बक्ताहरुले बताएका छन । हिलपार्क उत्कृष्ट गन्त्ब्य बनाउने गरि लाग्न सरोकारवाला निकायहरुको सुझाव दिएका हुन ।

रोटरी क्लब अफ बुटवल डाउनटाउनले बुधबार हिलपार्क विकास परिषद क्षेत्रमा गरेको वृहत वृक्षारोपण कार्यक्रममा क्लबका अध्यक्ष शिव ज्ञवालीले बुटवलबासीको सम्पत्ती हिलपार्कलाई थप सौन्दयीकरण र प्राकृतिक पूर्वाधार विकासमा जोड दिनुपर्ने बताए । ‘हामी हिलपार्कको सौन्दयीकरणमा हातेमालो गर्न तयार छौ ।’—उनले भने । परिषदको नेतृत्वसंग सहकार्य गरि आफुहरु काम गर्न तयार रहेको उनले प्रतिवद्धता जनाए । क्लबको सचिवालयसमेत रहेको हिलपार्कलाई थप ब्यवस्थित र सुन्दर बनाउनु जिम्मेवारीको रुपमा लिएको उनले बताए । हामीले मुलगेटदेखी माथिसम्मको सडकलाई भाईरल रोडका रुपमा चिनाउने गरि एउटै थरका फुलका बिरुवा रोप्ने र हुर्काउने लक्ष्य राखेको उनले बताए । ‘एक सय कल्कीका बिरुवा रोपेका छौ ।’—उनले भने । चराचुरुङ्गीहरुको चिरबिरसँग हिलपार्कमा मर्निङवाक र ईभिनिङ वाक गर्नेहरुलाई यो सडक थप आर्कषक बन्न सक्ने उनले दाबी छ । यो वर्ष रोटरी डिष्ट्रिकमा रहेका १५६ क्लबहरुबाट एक लाख बिरुवा रोप्ने योजना अनुसार वृक्षारोपण गरिएको उनले बताए ।

कार्यक्रममा परिषदका अध्यक्ष टंक पराजुलीले कुनै बेला चिहान डाडा र लागु औषध सेवनकर्ताको अखडा बनेको हिलपार्कलाई ब्यवस्थित गरि पर्यटकिय स्थलको रुपमा विकास हुन धेरै समयमा लागेको बताए । शहरको भिडभाडबाट निस्केर शान्त, मनोरम र हरियाली चाहनेहरुलाई उत्कृष्ट गन्त्ब्य भएको उनले दाबी गरे । हिलपार्कलाई विकास गर्ने धेरै सम्भावनाहरु हुँदाहुँदै पनि दीर्घकालीन गुरुयोजनाको अभाव, स्थानीय तह तथा सरकारी उदासिनता देखिएको भन्दै अब यसतर्फ विशेष योजनाहरु बनाउने उनले प्रतिवद्धता जनाए । कंक्रिटभन्दा पनि प्रकृतिमैत्री पूर्वाधारमा जोड दिने उनले बताए । हिलपार्कमा प्रवेश गरेदेखि डाँडाको टुप्पामा पुग्दासम्म ४ सय ८० सिँढी रहेका छन ।

रोट्याक्ट बुटवल डाउनटाउन, रोट्याक्ट बुटवल रामापिथेकस, रोट्याक्ट बुटवल सिर्नजी, ईन्नरह्विल क्लब अफ बुटवल जितगढीको सहकार्य तथा रोटरी क्लब अफ बुटवल डाउनटाउनको आयोजनामा भएको वृक्षारोपण कार्यक्रममा रोटरी डिष्ट्रिक ३२९२ जोन २८ का एजी जीवन अर्याल, परिषदका अध्यक्ष टंक पराजुली, क्लबका अध्यक्ष शिव ज्ञवाली, निवर्तमान अध्यक्ष कमला हमाल, क्लबका सचिव कमल नेपाल, रोट्याक्टका पूर्वअध्यक्ष विष्णु घिमिरेले वृक्षारोपण गरेका थिए । कार्यक्रममा हिलपार्कको मुलगेटदेखी माथिल्लो पिकनिक स्पटसम्म सडक किनारामा कल्की, निम र बेलका एक सय बिरुवाहरु रोपिएको तथा रोटरी बगैचासमेत सरसफाई गरिएको संयोजक भरत रानाले बताए ।