खोज

कपिलवस्तु, १५ साउन ।

कपिलवस्तुको बाणगंगा नगरपालिका क्षेत्रका सामुदायिक र संस्थागत विद्यालयहरुले विद्यालय हाता भित्र पाठ्यपुस्तक बिक्री गरेको भेटेपछि स्टेशनरी व्यवसायी महासंघ जिल्ला शाखा कपिलवस्तुले बाणगंगा नगरपालिकामा ध्यानाकर्षणपत्र बुझाएको छ । महासंघका जिल्ला अध्यक्ष अर्जुन चापागाई नेतृत्वको टोलीले बाणगंगा नगरपालिकाका शिक्षा शाखा प्रमुख खिम बहादुर जिसिलाई ध्यानाकर्षण पत्र बुझाएको हो । बुझाईएको ध्यानाकर्षण पत्रमा शिक्षा नियमावली (संशोधन सहित)२०५९ को नियम ३७ तथा संस्थागत बिद्यालय मापदण्ड तथा संचालन निर्देशिका (संशोधन सहित) २०६९ को परिच्छेद ४.४ को ७ मा भएको व्यवस्थाहरु बिपरित केही व्यवसायी र बिद्यालयहरुको मिलेमतोमा बिद्यालय हाता भित्रबाट पाठ्यपुस्तक तथा शैक्षिक सामाग्रीहरु बिक्रि बितरण गरेको पाइएको उल्लेख छ ।

बिद्यालय हाताबाट पाठ्यपुस्तक तथा स्टेशनरी सामग्रीहरु बिक्रि वितरण कार्य बन्द गराउन सबै बिद्यालयलाई परिपत्र जारी गर्न नगर सँग ध्यानाकर्षण पत्र मार्फत माग गरिएको हो । ध्यानाकर्षण पत्र बुझाउन महासंघ प्रदेश सदस्य बिनोद घिमिरे, जिल्लाका बरिष्ठ उपाध्यक्ष रणबहादुर क्षेत्री, उपाध्यक्ष शालिकराम पौडेल, कोषाध्यक्ष डासुराम पोख्रेल सहितको टोली नगरपालिका पुगेको थियो । सो पश्चात् नगरको शिक्षा शाखाले विद्यालय हाताभित्र पाठ्यपुस्तक र शैक्षिक सामग्री वितरण नगर्न परिपत्र गरेको शिक्षा शाखा प्रमुख खिम बहादुर जिसीले जानकारी दिए ।