खोज

मणिग्राम ।

तिलोत्तमा नगरपालिका वडा नम्बर ५ का विभिन्न टोलहरुमा सडक बत्ती जडानमा आर्थिक अनियमितता भएको भन्दै स्थानीयले छानविनको माग गरेका छन् ।

वडाका विभिन्न ८ वटा टोलहरुमा वडा कार्यालयले आर्थिक वर्ष २०८०÷८१ को नगर विकासको बजेटमा ४ लाख ३८ हजार रुपियाँ सडक बत्ती जडान तथा मर्मत शीर्षकमा बिनियोजन गरेको थियो । उक्त रकमबाट सडक बत्ती र स्ट्रीट लाइट जडानका लागि भन्दै उपभोक्ता समिति निर्माण गरिएको थियो । यो योजना अन्तर्गत ५० वाटको स्ट्रीट लाइट ४५ वटा, २० वाटको एलइडी लाइट १६८ वटा १८ वाटको एलइडी लाइट २२ वटा जडान गरिएको छ भने १४७ वटा मर्मत गरिएको छ ।

स्थानीय स्तरमा क्रियाशिल राजनीतिक दलहरु एमाले, माओवादी केन्द्र र राष्ट्रिय स्वतन्त्र पार्टीले उपभोक्ता समिति निर्माणदेखि नै वडा अध्यक्षले अनियमितता गर्न खोजेको देखिएको भन्दै यसबारे स्पष्ट पार्नुपर्ने माग गरेका छन् ।

वडाअध्यक्षले शुक्रबार बोलाएको सर्वदलीय सर्वपक्षीय बैठकमा सहभागी दलका प्रतिनिधिले बजार मूल्य भन्दा बढी रकममा सामान खरीद गरेर अनियमितता गर्न खोजेको बताए । कोटेशन आह्वान गर्दा नै बढी मूल्य पर्ने गरी मिलेमतो गरिएको र अपुरो उपभोक्ता समिति बनाएर बत्ती जडानका लागि छुट्टिएको सामान्य बजेटमा पनि भ्रष्टाचार गर्न खोजिएको बताए ।

एमाले ५ नम्बर वडा कमिटी अध्यक्ष कृष्णप्रसाद भट्टराईले पुस महिनामा विद्युत जडान गरिएको तर उपभोक्ता समिति बैशाखमा गठन गरिएको भन्दै यसमै अनियमितताको रहस्य देखिएको बताए ।

पुर्व वडाअध्यक्ष चेतनारायण भण्डारीले अनियमितता भएको छर्लङ्ग देखिएको भन्दै यसबारे वडा कार्यालयले स्पष्ट पार्नुपर्ने माग गरे । छलफलमा अन्य सहभागीले १८ सय पर्ने स्ट्रीट लाइटका लागि ३७ सयको बिल बनाइएको र ३०० पर्ने १८ वाटको ब्लवका लागि ५५० को बिल बनाइएको भन्दै आर्थिक अनियमितता भएको आरोप लगाएका थिए ।

तिलोत्तमा वडा नम्बर ५ का प्रभात टोल विकास संस्था, लुम्बिनी एफएम टोल विकास संस्था,, शान्ति नमूना, विद्यापिठ, हरियाली, सरस्वती, स्वर्गद्वारी र शिवालय टोल विकास संस्थामा रहेका सडक पोलहरुमा बत्ती जडान गरिएको थियो ।

वडाअध्यक्ष रमेश डुम्रेले भने उपभोक्ता समितिमार्फत पारदर्शी काम गरिएको र यसको अनुगमन पनि भैसकेको भन्दै कहीं कतै अनियमितता भएको भए छानविन गरिने बताए । उनले वडा कार्यालयको विकासमा सबैको उत्तीकै पहलकदमी जरुरी रहेको बताए ।