खोज

बुटवल, १ साउन । संघीय सरकारले नयाँ नेतृत्व पाएको छ । नेकपा एमाले र नेपाली कांग्रेस बिचको गठबन्धनबाट सरकारमा सहभागी भएका पार्टीका मन्त्रीहरू मध्ये सबैभन्दा ओजपूर्ण लुम्बिनी प्रदेशबाट विष्णु प्रसाद पौडेल उपप्रधान तथा अर्थ मन्त्री भएका छन् । रूपन्देही क्षेत्रनम्बर २ बाट निर्वाचित भएका उनी बुटवलका बासीन्दा पनि हुन् ।

नेकपा एमालेका केन्द्रीय उपाध्यक्ष समेत रहेका पौडेल एमाले पार्टी भित्र ओलीका विश्वास पात्र तथा प्रभावशाली मानिन्छन् । उनी यो संगै अर्थमन्त्रालयमा पाँचौ पटक मन्त्री बनेका हुन । नवनियुक्त उपप्रधानमन्त्री एवं अर्थमन्त्री विष्णुप्रसाद पौडेलले मुलुकको अर्थतन्त्रमा देखिएका समस्या समाधान हुँदै जाने विश्वास व्यक्त गरेका छन् ।

सोमबार अर्थ मन्त्रालय पुगेर पदभार ग्रहण गर्दै मन्त्री पौडेलले स्थायी सरकार गठन भएसँगै मुलुकको अर्थतन्त्रमा देखिएका समस्या समाधान हुँदै जाने विश्वास व्यक्त गरे । सरकारको साेंच र दृष्टिकोण कार्यान्वयन गर्न बजेट बाधक नबन्ने समेत उनले बताए । यदि बाधा देखियो भने कसरी फुकाउने भनेर कानुनी र संवैधानिक व्यवस्थाका आधारमा संशोधन प्रक्रियामा जाने उनको भनाइ छ । उनले शेयर बजार अर्थतन्त्रको ऐनाका रूपमा रहेकाले यो क्षेत्र सन्तुलित ढंगले अघि बढोस् भन्ने चाहना रहेको बताए । पौडेलले विकास वित्तका क्षेत्र पहिचानका लागि अध्ययन गरिनेसम्बन्धी पहिलो निर्णयमा हस्ताक्षर गरे ।

यस्तै बलराम अधिकारी नेकपा एमाले बाट मन्त्री बनेका छन् । भूमि व्यवस्था, सहकारी तथा गरीबी निवारणमन्त्री अधिकारी कपिलवस्तुका हुन । प्रत्यक्ष (कपिलवस्तु १) नेपाल कम्युनिष्ट पार्टी (एमाले) बाट निर्वाचित अधिकार बाणगंगा नगरपालिका–८, चप्परगाउँ, कपिलवस्तुका हुन ।
२०३४ सालदेखि विद्यार्थी राजनीति सुरु, २०३८ सालमा कास्कीमा विद्यार्थी र पार्टी राजनीति सुरु, २०४३ सालमा कपिलवस्तुमा बसाइँ सरेपछि अधिकारीकै नेतृत्वमा नेकपा माले पार्टी सम्पर्क कमिटी गठन, २०४७ सालमा एमाले गठन भएपछि जिल्ला सचिवालय सदस्य र संगठन विभाग प्रमुख, २०५५ सालदेखि १५ वर्षसम्म पार्टीको प्रमुखका रूपमा सचिव र पार्टी अध्यक्षात्मक प्रणालीमा गएपछि अध्यक्ष, एमाले लुम्बिनी प्रदेश समितिको कार्यालय सचिव भई दुई वर्ष काम गरेका थिए । अहिले एमाले पार्टी केन्द्रीय सदस्य र कपिलवस्तु इन्चार्ज रहेका छन् । २०५६ सालको संसदीय निर्वाचनमा क्षेत्र नं. ३ र २०६४ मा क्षेत्र नं. १ बाट संविधानसभा सदस्यमा प्रतिस्पर्धा गरेका थिए । दुवै निर्वाचनमा पराजित भएका उनी २०७० मा क्षेत्र नं. १ बाट संविधानसभा सदस्यमा विजयी भएका हुन । साढे चार दशकभन्दा लामो राजनीतिको अनवरत यात्रामा रहेका अधिकारी राजनीतिमा अनुभवी नेताका रूपमा चिनिन्छन् । राजनीतिक आन्दोलनका क्रममा चारपटक प्रहरीद्वारा पक्राउ परी प्रहरी हिरासतमा समेत परेका थिए ।
उनी दोस्रो पटक भूमि व्यवस्था, सहकारी तथा गरीबी निवारणमन्त्री बनेका हुन । यो बाहेक लुम्बिनी प्रदेशबाट कुनै पनि मन्त्रीले संघीय सांसदमा यो पटक स्थान पाएनन् । २२ सदस्य मन्त्री मण्डलमा दलित समुदायबाट शुन्य प्रतिनिधित्व रहेको छ ।