खोज

बुटवल,२१ असार । माध्यमिक शिक्षा परीक्षा एसइई २०८० को नतिजामा शतप्रतिशत विद्यार्थी उत्तीर्ण गराएको आवर पिसल्याण्ड एकेडेमी बुटवलले विद्यार्थीहरुलाई सम्मान गरेको छ । बुटवल ७ शिवनगरस्थित विद्यालयको सभा हलमा आयोजित कार्यक्रममा एसइईमा सहभागी भई उत्तीर्ण २९ जना विद्यार्थीहरूलाई बधाई ज्ञापनसहित सम्मान गरिएको हो।

कार्यक्रममा बोल्दै बुटवल उपमहानगरपालिकाका माध्यमिक शिक्षा शाखा प्रमुख उपनिर्देशक टिकाराम पन्थीले यसपटक देशभरको एसईई नतिजा निराशाजनक आएको अवस्थामा आवर पिसल्याण्ड एकेडेमीले शतप्रतिशत विद्यार्थी गराउनु ठूलो सफलता भन्दै अब कक्षा ११ र १२ मा थप राम्रो नतिजा ल्याई असल र योग्य नागरिक बन्न शुभकामना दिए ।

विद्यालय व्यवस्थापन समिति अध्यक्ष कुलानन्द पाण्डेले २०५९ सालमा स्थापना भएको विद्यालयले २०६८ सालको साविकको एसएलसीदेखि नै उत्कृष्ट नतिजा ल्याइरहे पनि उचित प्रचार प्रसारको अभावमा आफ्नो विद्यालय ओझेलमा परेको बताए । विगतमा देशभरबाट ३ जनाले जिपिए फोर ल्याउँदा आफ्नो विद्यालयबाट एकजनाले जीपीए फोर ल्याउन सफल भएको इतिहास रहेको भन्दै विद्यालयले पाठ्यक्रमको ानका अतिरिक्त विद्यार्थीको अनुशासन , असल संस्कार र सिर्जनशिलतामा विद्यालयले विशेष जोड दिंदै आएकाले गुणस्तरमा अब्बल भएको बताए ।

विद्यालयकी प्राचार्य गंगा भण्डारीले विद्यालयले हरेक वर्ष शतप्रतिशत नतिजा ल्याइरहेका बताउँदै यो सफलतालाई बाहिर पुर्‍याउन नसकेको बताइन् । विद्यार्थीलाई सिर्जनशील बनाउन बाल साहित्य समेटेर नियमित भित्ते पत्रिका प्रकाशन र अभिभावकसँग निरन्तर अन्तर्क्रिया गर्ने गरिएको प्राचार्य भण्डारीले बताइन् ।
कार्यक्रममा अभिभावक संघ रुपन्देहीका अध्यक्ष लोकनाथ ज्ञवालीले अभिभावक र विद्यार्थीले ठूला भवन र बाहिरी हल्लाको पछि नलागी गुणस्तरीय पढाई हुने विद्यालय छनोट गर्नुपर्ने सुझाव दिंदै कक्षा ११ मा भर्ना हुंदा रुचि अनुसारको विषय पढाउनु उपयुक्त हुने बताए ।
एसइईमा विद्यालयबाट ३ जनाले ए प्लस, १७ जनाले ए , ९ जना बि प्लस ग्रेड ल्याएका शिक्षक रोमाञ्च पुनले जानकारी दिए। सो अवसरमा विद्यार्थीका अभिभावकलाई समेत सम्मान गरिएको थियो ।